Wees fief Minuten still
5. Mai

Maakt sik Frünnen mit den ungerechten Mammon.

Lukas 16, 9

Dat Geld höört doch nich uns to.

Geld an sik is ja noch keen Mammon. Bloots de Aart, woans wi doran hangen doot, wiest, wat dat Mammon is. Gott will, dat wi uns dormit Frünnen maken doot. He will, dat wi dat Geld in Leven un Freid verwannelt, dat wi dormit Freid maakt. Nich bloots mit Geld. Man ok mit Geld. Ok mit uns Wahnung. Mit uns Möblemang. Mit en Disch. Mit en Breef. Orr en Pakeet. Ok mit uns Temprament. Maakt sik Frünnen mit juun Temprament!

De Paketen un dat Geld un dat Temprament hebbt an sik keen Gerechtigkeit. Se sünd alltohoop ungerecht. Gerecht, also richtig warrt se eerst, wenn wi ehr för annere insetten doot, wenn se för anner Minschen dor sünd. Dat will Gott vun uns. Wokeen vun Natuur fröhlich is, schall annerlüüd fröhlich maken; wokeen Geld hett, schall annerlüüd wat geven. Wokeen en Wahnung hett, schall annere inladen. Wokeen en fröhlich Huus hett, schall annerlüüd mit de Fröhlichkeit ansteken! Hangt dor doch nich an fast! Wokeen allens för sik behöllt, maakt dat ungerecht. Bruukt dat richtig! Laat dat dör Gott gerecht warrn! Dör unsen Deenst an anner Minschen.

O Gott un Herr, du hest uns Gaven schenkt. Laat se uns nich in de Hannen fasthollen, dat se verdarvt. Giff, dat wi uns Huus apen hollt, dat annerlüüd an uns Freid deelhebben köönt, un wohr uns dorvör, dien Gaven to missbruken, as wöörn se alleen uns tohöörn. Dat is ja, Herr, dien Geschenk un Gaav.