Wees fief Minuten still
3. November

Un nu noch en letzt Wort: Seht to, dat ji stark warrt in den Herrn un in de grote Kraft, de he geven kann.

Epheser 6,10
Plattdüütsch na Johannes Jessen

"Nu rappel di mal hooch! Nimm di doch beten tosamen! Nu haal man mal deep Luft, denn kümmst du ok wedder togangen!"
Dat sünd so uns Raatslääg, wenn wi enen annern Minschen Moot maken wüllt.

Ganz anners maakt dat de Schrift. Dat kümmt dor nich up an, dat wi uns up uns besinnt, dat kümmt dor up an, dat wi uns endlich up em besinnt.

"Seht to, dat ji stark warrt in den Herrn un in de grote Kraft", dat bedüüdt: Kraamt nu nich juuch egen Reste tohoop, sünnern besinnt juuch up Gott sien Kraft, de juuch geven worrn is.

En Prokurist tellt doch ok nich dat Geld in sien egen Breeftasch, he ünnerschrift den Wechsel doch nich in'n Blick up siene egen Finanzen. Nee, de Kredithööcht warrt vun den Mann diktiert, den allens tohöört. Worüm arbeidt wi jümmer mit uns Taschengeld? Worüm sett wi nich den ganzen Pries in, den wi insetten dörvt in'n Blick up den hööchsten Kredit, de tolaten is? Ahn Grenzen!

Bargen ümsetten kann een mit so enen Kredit!

Dorüm: Seht to, dat ji stark warrt in den Herrn un in de grote Kraft. Bruukt sienen Kredit.

To'n Anhören hier klicken:

Lesen deit Anke Nissen in Holsteiner Platt.