Wees fief Minuten still
19. November

Passt ja op, dat nich een Gotts Gnaad verpassen deit!

Hebräer 12, 15

Is dat denn mööglich? En Toog verpassen, ja. Sik to laat op de Siet vun en Partei slaan, ja. Allens dat kann di passeern. Avers Gotts Gnaad verpassen? Klingt doch as en bekannte Trick bi Evangelisatioon, de di ünner Druck sett mit Geschichten vun Lü, de op de Straat doodfohrt woorn un keen Tied mehr harrn, ehr "Reken mit den Himmel" to maken. Is doch nix as Bangemaken un Erpressung!

Holl stopp! Wenn de Bibel seggt, Gotts Gnaad kannst verpassen, denn stimmt dat. Avers dat is keen Drauhn, sünnern en Angebott.

En Angebott vun Gott is avers keen Plattenopnahm, de endlos mechaansch löppt. Gott steiht nich in eensento paraat för uns' willkürliche To- orr Afseggen. Wa heet denn uns' neegste Programmpunkt? "Teihn Johr hebbt's uns ut den Arbeitsprozess ruthaalt, nu mutt ik eerstmaal ophalen. Nu mutt ik eerstmaal dat Geschäft ankurbeln. Nu eerst Karriere maken. Nu eerst dat Huus buun. Nu eerstmaal för'n anstänniges Inkamen sorgen. Nu eerst mal, nu eerst mal..."

Wokeen so snackt, denkt, he kunn mit Gott verhanneln. Avers Gott will an us hanneln — jüst in düss uns' Tied.