Wees fief Minuten still
31. Oktober

För uns steiht das ganz fast:
Een warrt gerecht maakt alleen dörch Glöven, dörch nix wieder.
Wat de Minsch daan hett na dat Gesetz, dat fallt ganz ünnern Disch dorbi.

Römer 3, 28
Na Johannes Jessen

Wat bedüüdt denn nu evangelisch?
Wodörch meent wi, dat wi vör Gott gerecht sünd?
Wat tellt wi up?

Wokeen Werke vun 't Gesetz, wokeen also Saken uptellt, de he maakt hett, de he utführt hett, de is nich evangelisch.

Wokeen also meent, he mütt dit orrer dat noch vörbringen: "Wenn Gott mi süht, denn kann he ja gor nich anners; poor Saken heff ik doch fein henkregen, de mütt Gott doch imponieren. Ganz ut Gnaad, dat is doch wohl beten wat överdreven. 95% Gnaad, 5% Anerkennen vun dat egen Anstrengen! Wenn de Herrgott süht, wat wi hier allens to lieden hebbt, so veel Hunger un so veel Kranksien un so veel Gefangenschaft un so veel Starven, denn mütt he uns doch goot sien." —
Wokeen so orrer so ähnlich denkt, de is nich evangelisch.

Dat hele Evangelium gellt, dat totale Erlösen, dat ganze Betahlen. Worüm?
Wiel sik dat üm Gott sienen Söhn hannelt.
Wiel Gott ganz daan hett, wat he daan hett. Nich in Prozente.
Wiel dat de Ehr vun Gott towedder is, wenn man em seggt: "to 'n Deel du, to 'n Deel ik."

Un dat is goot so, dat Gott allens övernimmt. Dorüm sünd evangelisch Lüüd, de evangelisch leevt, Minschen vull vun Trost. De kiekt nich up ehre Prozente, ok nich up de Prozente, de anner sammelt hebbt. Nee, se kiekt up de ganze Summ vun Gott. De is stabil. Gott wees Dank, nich wi, nich anner betahlt: He betahlt.
Wo fröhlich Evangelische sien köönt!