Wees fief Minuten still
6. September


Andacht vun Heinrich Giesen, in Platt bröcht vun Marlou Lessing

Laat af vun Ungerechtigkeit, 'keen den Naam Christi nömen deit!

2. Timotheus 2, 19

"...Natüürlich warrt wi dat an uns Stiftungsfest nich utlaten, dat wi alltohoop un in vulle Tall in SeEhrn Gottsdeenst kaamt. Uns' Fahnen wüllt wi denn natüürlich blangen den Altaar stahn hebben", schrifft de Vereensbaas.

Laat af!, seggt Paulus. 'keen den Naam Christi in den Mund nimmt, mutt de Konsequenzen trecken. Wenn he för sik sülvst Reklaam maken will, schall he Christi Naam weglaten. Wenn een Geschäfte maken will, denn nich ünner de Firma Christi. Vun't Geschäftemaken un vun't Trummeln för de egen Saak schallt de aflaten, de Christi Naam nöömt.

Dat is en hatt Woort in so en christlich Welt. Denn wi hebbt ja sehn, dat een good den Afsatzmarkt vergröttern kann, wenn een Boomwull un Christus togleik anbeden deit. Wi hebbt sehn, dat en Partei in ehr Programm dat "Positive Christendom" rinschrieven un dormit Christenminschen na de Wahlurne locken kann.

Laat all Nevengedanken na! Denn Gott lett sik dat nich gefalln, dat een mit sienen Naam sik sülven deent. — Wat wüllt wi hüüt vermengeleern? Mit Christus lett sik Egennutt nich vermengeleern un nich verbinnen. Wokeen den Naam Christi nömen deit, kann bloots em deenen, ganz egaal, wat dorbi rutkümmt.

Gott un Herr, wohr mi dorvör, dat ik dienen Naam Unehr maken do mit mien Geschäfte un Vörhebben. Laat mi bloots di menen un nich mi. Laat mi di denen un nich mi. Giff, dat ik mit di nich Verdeenst noch Verdeensten winnen will.


6.9.2020


na baven