vun Silke Frakstein Wat is dat? De Lottofee mit'n Million? Nee, seggt de anner, dat is ne Reis in de Südsee. Och wat, Glück? veer gesunne Kinner. Ach Kinners, dat gifft so veel. Enen Sünnenünnergang an't Woter orrer in de Bargen. Een Ros in vulle Pracht un in de Mitt de Immen, de flietig Honnig klaut. Orrer ganz eenfach gesund blieven.
För mi is Glück: In'n Schummern op mien Balkon to sitten. De Dag geiht un de Nacht is nich mehr wiet. Mit'n Mol koomt dor de Mai-/Junisebbers un fleegt hen un her. Süht meist ut, as weern se besopen. Ssssssssssssmmmmmmm, överall brummt se gegen. Klack, liggt wedder een op'n Disch. Lütt beten bedusselt rappelt he sik op un torkelt wedder no boben, no de Dackrönn. De Swulken suust an'n Heben mit ehr Szzzzzz Szzzzzz Szzzzzz.
Un denn, en beten loter, meist kunnst nix mehr kieken, koomt de Fladdermüüs. De Luft is swoor un allens in mi fangt an to singen, wo scheun düsse Ogenblick is. Mien Hart is free un wiet. Schietbüdel kümmt mit'n Glas Rotwien. Glück? Dat is, wenn du mit di tofreden un in Neendörp to Huus büst. De Moond an'n Heben denkt dat ok un plinkert uns to.
|
||
4.6.2006 |