De gode Roat

vun Sabine Brauer

Gertrude is 'n junge Frau in d' Dartigen. Heel ut Puust kummt se in d 'Koken rennt un vertellt hör Moder, dat he hör in d' Aarm nomen harr.

Gedüür, scan by Yellow Lion/Wikimedia Commons

"He" wär hör Steefvoder. Se har immer docht, he much hör villicht so 'n spirke lieden. Hör weer dat immer egoul west, he weer ja nich hör Voder. Nu harr disse ole kranke Keerl an hör seggt: "Du west ja gor nich, wo leev ik di hebb." Dat weer 'n langet Gespräck worn un hör weern de Trounen övert Wangen lopen vör Beweechtheit. De junge Frau kann d't heel nich fouten.

Un hör Moder? Se kickt hör Dochter lang an un seggt denn: "Och jo. Stell d't up Schkapp un lout d't offköhln." Ohn Emotschonen, eenfach: "Stell d't up Schkapp un lout offköhn." Gertrude fehln de Woorn. Sowat hett s'van hör Moder noch noit hört. Wat hartlos!

Man denn geiht Gertrude dat Leven van hör Moder un hör Steefvoder in Gedanken noch moul dör. Se stellt fast, Mama het dat tiedwies leep stur mit disse Mann hat. Wenn se Gott bi d' Hochtied nich schwoorn harr: "In gouden as in maale Tieden....", se weer vandogen nich mehr mit Hermann verheirood.

Obers disse Woorn louten Gertrude nich mehr los. Stell d't up Schkapp un lout d't offköhln. Wat hett disse Satz vör 'n Utsoug? Wenn d't um 'n hete Zoorp geiht, is he inlüchtend. Is de Zoorp to heet un du to ungedüllig, verbranndst di d' Muul.
Man wat bedüüt he för hör Leven?

Graffiti Kreuzberg, Bild Jotquadrat/Wikimedia Commons

Meent he nich, se sall nich to överschwenglich un emotschoonsgeloden hanneln?
Stell d't up Schkapp un lout d't offköhn. Lett se sük disse Woorn up d' Tung zergouhn, kriegn de 'n heel neei Bedüdung.

Lööv nich allens, wat man di vertellt. Bedenk in Ruuh, off annern dat Eernst mit di meenen. Wovöhl Leed bruugt dat nich to geven, wenn juung Minschen in hör Verleevdheit 'n köhlen Kopp behulln. Wenn s' hör Geföhlen eerst em up Schkapp stellden un offköhlen leten. Dor würn nich so vööl Kinner ohn Voder upwassen.

Gertrude överleecht sük 'n anner Bispöhl: Irgendwell hett di beleidicht off di heel maal Souken an d' Kopp schmeten. Futt geihst du hum an d' Kroouch! Halt! Stopp!

Stell d't up Schkapp un lout d't offköhln. Överdenk, wat he di vörschmitt. Is dor nich ok 'n heel büllt Wohrheit mit in? Wenn du dat spitz kregen hesst, proot dor toerst mit Gott över. Denn gouh nou dien Nahsten. Villicht spiet hum sien Wutanfall. Denn könnt ji dor in Ruuh över proten unnanner vergeven. Wenn nich, denn weer d't 'n Versöök wert. Gertrude word kloar, hör Moder weer nich hartlos. Se geev hör 'n gode Roat.