Radels

Andacht in Grönau, hollen an'n 25.5.2008 vun Hans Andresen

Wat he sik vörnahmen harr —
Dor achter keem bet herto nüms.
Un goden Rat —
wer hett em den wohl geven?

Bibelöversetten vun Johannes Jessen

Wer weet wohl Gott sien Gedanken?

Wenn ik mi dat so dörch den Kopp gahn laat, wat sik de Minschen in de söventig Johren utdacht hebbt — de ik mit beleevt heff —, denn mütt ik mi blots wunnern.
Wenn dat so wiedergahn sull, denn warrt dat bald keen Radels mehr geven, wat de Minschenverstand nich al lööst hett.

"So dull is dat nu wedder nich", hett mi kortens en jungen Medizin-Professor seggt, "Radels gifft dat noch noog. Wenn wi een rutbröcht hebbt, warrn wi gewohr, dat dor achter noch wedder en poor niege sitten, vun de wi vörher keen Ahnen harrn."

Ik heff mi nu ja freut, dat de junge Professor so bescheiden snackt hett, un dorüm heff ik to em seggt:
"Weten Se, Herr Professor, dat Se in vele Stücke mit den Apostel Paulus övereen stimmen?"
"Nanu", hett he lacht, "ik mit Paulus. Dat kümmt mi doch dösig vör."
"Jawohl, Se mit Paulus! De is ja ok en nadenkern Minsch west. He hett in siene Gedanken noch höger grepen as ji Mediziner. He hett enen groten Deel Radels lööst, de uns Gott sülven upgeven hett. Dorbi hett de Apostel sik an dat hollen, wat Jesus Christus uns vun sienen Vadder apenbor maakt hett.
Wüllt Se en poor Lösungen höörn?

1. Is Gott för uns, wer kann gegen uns sien?
2. Wer will uns verdammen? Christus is hier, de för uns storven is!
3. Ik weet gewiss, dat keen Dood un keen Leven, nix Hoges un nix Depes uns vun Gott siene Leevde scheden kann.

Galaxie, Foto: Hubble-Teleskop/Wikimedia Commons

Nadem dat Paulus disse Lösungen funnen harr, is he gewohr worrn, dat achter ehr noch en ganz groot Geheemnis sitten deit: Gott sülvst!
Dat seggt he uns in Römer 11:

"Wer weet wohl Gott sien Gedanken?
Allens is dörch em entstahn un hett dörch em Bestand!
Em wees Ehr för alle Ewigkeit!"

Un wat glöven ji, wat mi de junge Professor to Antwort geven hett?
Recht hett he mi geven.

Amen.