Un noch wat wull ick seggn: Staht all' up een Stück un verdrägt ju good! Hebbt en Hart för de Annern! Holt de Broderlew hoch! West barmhardi un speelt ju nich up! Deit di een wat Böses an, denn betal em dat nich mit Böses torüg! Seggt een en hartes Word, denn giff dat nich glieks so wedder torüg! Nä, seg'n schallst du em! Dorto sünd ji dor. Sünst ward ji ock den Segen nich kriegn.
Denn „wer wat vun sin Lewen hebbn un goode Dag' sehn will, de schall sin Tung in Toom holn, dat se nich Böses anrichden deit, un sin Lippen, dat se nich Lögen un Wind makt. De schall sin Hann'n vun dat Böse rein holn un dat Goode don. De schall tosehn, dat he in Freden mit de Annern utkümmt, un sick dörför insetten. Denn Godd sin Ogen seht hen up de Gerechden un sin Ohrn hört up ehr Beden; awer de, de Böses dot, de kann he nich utstahn."
Un wer kunn ju wull wat Böses andon, wenn ji ju gans för dat Goode insett? Un schull dat so kamen, dat ji vunwegen de Gerechdikeit mal lieden möt, denn sünd ji doch selig! Wüllt se ju bangmaken, denn verfehrt ju nich, un lat' ju nich in Schock jagen! Awer de Herr Christus schall ju hillig wesen in ju Hart. Ji schüllt alltieds up'n Posten wesen un ju för den Glowen insetten gegen jedermann, de vun ju kloren Bischeed förrert öwer de Hoffnung, de in ju lewen deit. Awer west sinni dorbi un verget nich, dat ji ünner Godd sin Ogen staht! Un sorgt dörför, dat ji dorbi en reines Geweten beholt. Dat mutt so kamen, dat de, de ju wat up'n Stock dot, wieldat ji örndli lewt, äs sick dat för Christen hört — dat düsse Lud mit ehr leege Snackerie sülbn sick en Tort andot. Dat is doch beter, wenn wi denn nu mal na Godd sin Willn lieden schüllt, dat wi dat dot, wieldat wi Goodes dot, as wenn wi Böses dot.

Översett vun Johannes Jessen

Dat geev in de verleden Daag vun de Footballweltmeisterschap wenig Minschen, de nich mit den Football-Virus infizeert west sünd. Ok männich een, de ansünsten nich veel för dat Speel op den grönen Platz över hett, hett sik mitrieten laten.

Meist mehr as 30 Millionen Lüüd hebbt an de Fernsehers seten un sünd to de "Public-Viewings-Partys" gahn, as to dat Speel gegen Spanien, för dat Jogi Löw siene Mannen för dat runde Ledder africht hett. Noch bi 't Anfleiten, dor weern all Lüüd rein ut de Tüüt. Himmelhooch juuchheit hebbt se, aver na 90 Minuten, dor weern se all to 'n Dood bedeppert.

Ja, so is dat mit de minschlich Begeisterung. De duurt blots so lang, as dat to de Hööchde tostüürt. Wenn 't denn wedder dal geiht, wenn de Stars nich dat bröcht hebbt, wat de Barg Lüüd vun se verwachten, denn so slüggt de Stimmung üm un sitt in 'n Keller.

Aver dennso hebbt sik de Speler to de Partie üm de drüdde Steed wedder verpuust un upmöbelt un noch eenmal upswungen to en Speel vull vun Kraft, Insetten un Freid an't Speel.

Liekers wunnerwarkt wi Christen, wo dit lütt rund Ledder un en poor Mannen, de em vör sik her drieven, de ganze Welt in Atem hollen un to överschümen Freid mitrieten kann. Dat bringt ok nix, wenn de een un de annere suurpotsch över "niede Religion" un "Football-Götter" schimpen. De Sport wiest sik up as en stark Stück Leven. Dor sünd dicht bi'nanner dat Höpen un dat Biestergahn, de Freid un dat Bedrübbeltsien, dat, wat Minschen tosamen bringt, un dat, wat se ünnerscheden deit. Dor is en Kraft achter, de Millionen vun Minschen in disse Wedderparts liekers to liedsam Freid un Fier tosamen bringen kann.

Bild: Wikimedia Commons

Football, "de schöönst Nevensaak vun de Welt", hett de Minschen tosamen bröcht un is de Anstött to dat gröttst Fest, dat de Minschen nich blots in Düütschland, nee, över de ganze Welt tohoop betto fiert hebbt.

Bild: Wikimedia Commons

So, as dat an den doren Abend in Kapstadt, in Durban, güstern Abend in Port Elizabeth un in de ganze Welt togahn is, stellt wi uns dat doch to Pingsten vör, wenn dat in de Apostelgeschicht heet: "De Minschen weern vergnöögt un een Hart un een Seel." Blots dat in disse Weken nich de Hillige Geist dor achter stünn — oder is he doch mit an Wark?

Wi bruken nich afgünstig sien, uns ok nicht blameert föhlen. Ok as Christen könnt wie uns anstecken laten. De een oder de annere Gemeen ist denn ok instegen un hett de ganze Stimmung upnahmen, hett inlaadt to ökumenische Gottsdeensten, hett Parties arrangeert un de Football-Devotionalien mit christliche Utsagen ümfunktioneert.

In den Bökerladen vun de Herrenhuter Gemeend heff ik enen Football funnen mit de Slogans: "Christsein, eine runde Sache!" un "Ich glaube dran!"
Dor up sünd ok christliche Bekenntnisse vun Football-Stars to lesen:
Bastian Schweinsteiger: "Ich glaube einfach, dass Gott mit im Spiel meines Lebens ist!" Lukas Podolski: "Ich glaube an Gott und bete für viele Dinge!"
Adhemar: "Die Entscheidung, mit Jesus zu leben, war das wichtigste Tor meiner Karriere."

Hm, tja, männich Footballers ut Latienamerika heet ja wohraftig "Jesus" mit Vörnaam!

Dat much ja na unsen Smack to wiet gahn, wenn een T-Shirts köpen kann in de Bundsfarven un mit de Upschrift: "I love Jesus", Böker mit de Upschrift "Die Bibel, ein Volltreffer", Baseball-caps mit'n Football in'n Fisch, Püüsterballons mit den Slogan: "Mit Christus siegen" orrer Gedüürspelen, up de to lesen steiht: "Mit Gott zum Erfolg".

Een much wunnerwarken över disse Bekenntnisse un kann över all den Schnickschnack dinken, as he will.
Aver en anner Teken in disse Daag hett uns Indruck mookt un to dinken geven:
dat is dat Beleven, dat de Düütschen — un de Niebürgers, de ut anner Länder to uns kamen sünd, sik dor anslaten hebbt — dat se all Flagg wiesen deen. Millionen von swatt-root-güllen Flaggen in de Hannen un üm de Liever vun junge Lüüd, an de Autos un Hüüs wiesen up: Wi sünd een Gemeenschap un hebbt all een Ziel. Een groot Geföhl vun Solidarität, vun mit'nanner Beleven hett all tofaten kregen, wat wi uns bet nu nich totruut hebbt. Bi unse öllern Minschen steekt de Menge vun Flaggen vun de Nationalsozialisten un dat, wat se utdrücken, noch deep in de Seel. Aver bi de junge Generation is dat överwunnen. Mit de könnt ok wi wedder Flagge upwiesen un stolt sien, dat wi Düütsche Geswister in de groot, verdrääglich Minschenfamilie sünd.

Wenn dat doch ok mit uns Christengloben so sien kunn! Wi beleven dit Geföhl blots noch, wenn wi up'n Karkendag sünd. Wi hebbt uns afdrängen laten to en Minnerheit, wi hebbt uns trüggtrocken un sünd unseker worrn. Uns Globen hebbt wi to uns egen Privatsaak maakt: "Ik heff mien Glooben in mien Hart, dat is mien ganz persönlich Saak, dat geiht nüms wat an! Dor över snack ich nich!"

Wo heet dat in den 1. Petrusbreef: