De Hillige Damm

vun Rudi Witzke


Stormfloot
Digitaliseert: © RW

Ut vergahn Tieden ward mennigeen Geschicht vertellt. So ok de vun den Hilligen Damm. An de Oostsee in de Negde vun Bad Doberan weer een siede Steed an de Küst, wo en Stormflut Leges anrichten kunn. So sehgen de Inwahner dat seker Verdarven up sik tokamen. Elkeen Dag halte sik de See en Eck Land. De Hüüs, de dicht an't Wader stünnen, kunnen bi de neegst Stormflut in de See störten.
Dor wöör in alle Karken in't ganze Meckelborger Land Beedstunnen anseggt. Un dat Bidden un Schrien vun en ganz Land fünn Gnaad vör den Herrn. —

Upletzt weern de Minschen an den störmschen Dag mit Forcht un Zagen in de Puuch kråpen, un vele fünnen kein Slaap. Dat Ruschen vun de See weer to gewaltig. De Erd beverte, un Blitze tuckten över de Bræcker vun de wille Oostsee. Denn wöör dat still, un de Maand keem achter de Wulken vör. Vull Ängsten truten liekers sik welk, vun'n Strand ruttokieken up de See. Dor leeg wat Grotes, Düsteres in't Water, un welk harrn dat Meinen, dat müßt een Kraak sien, de mit sien Rüüch ut de Wellen vörkeek. Un as de Dag keem, dor passeerte dat: Dat Wader verleep sik mehr un mehr weg vun'n Strand. Un vör de verbasten un verdatterten Lüüd leeg en hoge Düün as en Wall un faste Damm. De weer vunwegen dat Beden vun dat ganze Land in een Nacht entstahn mit Gott sien Hülp. Alles Volk lavte Gott. Un se nömten den Damm den Hilligen Damm un künnen em nich ahn Dank un Ehren anseihn.

Nu in dat Johr 2007 reikt de hoge Düün nich mehr. Landeinen buuen se en 13 Kilometer langen un 2,50 Meter hogen Tuhn, bavenup en Rull NATO-Tackeldraht, an de Pahls Videokameras un Bewegensmeller. Dortau kaamt 15000 Polizisten mit automaatsch Scheitgewehre, Knüppel un africht Hunnen. In de Luft brusen all poor Minuten Tornados över Hilligendamm weg un lichten af, wat sik dor ünnen wat bewegt, dat se seihn, wat nich henhört. Wat woll all Wildswien, Hüürsch un Reeh Utwies kregen hebbt, dat se üm un bi Hillgendamm leven köönt? Vör de Düün krüzen grote Kriegsscheep un föhlen allens unner un över dat Wader mit ehren Radaar af un lüchten mit Schienwerfer in de Nacht up de Söök na dörchsickern Fienden.

Un woso dat allens? Dor finndt vun'n 6. bit 8. Juni de G8-Gipfel statt. De söven Bosse vun de rieksten Länner un Putin ut Russland, wieldat he mit Gazprom dat mehrste Eerdgas hett, kamen tosamen un beraden. Se beraden, woans dat mit den Riekdoom wiedergahn schall. Kloke Lüüd seggen: Weltwirtschaftsgipfel deinen de globaal Koordinatschoon un dat Updeilen vun de Macht över den Rest vun de Minschen (198 Staaten gifft dat up uns Eerd). De G8-Lüüd vertreden wohrhaftig blots en Minnerheit. Up de Wies muurn se de liberale Wirtschaftsornung mit ehre legen Nafålgen für de Mehrheit vun de Minschen to. En utsöcht Minnerheit nümmt den Riekdoom för sik, den Millionen dörch ehre harde Arbeid produzeern.

Foto: H.-J. Grebin
Foto: H.-J. Grebin

Wi staht de to Siet, de dorgegen den Mund upmakt: Gegen Machtstrategien un Kriege, gegen dat Rümasen mit de Schätz vun uns Eerd un gegen dat Ännern vun uns Klima. Wenn he dat ok anners seggt hett: De gobaal Kaptalismus drifft de Minschen in Levensnoot. Ahn Freden is allens nix. Un ahn Anter up de drauhen Klimakatastrooph is allens nix.

De Düün vun Hilligen Damm hett Gott upricht, den Tuhn buut nu de Minschen. He ward de 100.000 un mehr Lüüd, de an Oort un Steed wat gegen de G8-Politik seggen willen, afhollen. He ward standhollen, eerst recht gegen de swiegen Millionen Minschen. Un wenn welk dat Muul to wiet uprieten, dennso warden de Putze ehr schon Moritzen liernen. Wotau hebbt se ehr Gummiknüppel mitbröcht?

De Riekdoom ward bi de Rieken blieven. Un de Hoge Düün, de Hilligen Damm heit, blifft ok in de Oostsee. Mit Euros, Dollars un Bruttosoziaalprodukt hett Gott nix to daun. Un wat de Tühn, Muurn un Euros un Dollars jümmer blieven, dat glööv ik nich.


De Sage vun den Hillgen Damm is vertellt na Ludwig Bechstein, "Deutsches Sagenbuch", Leipzig 1853.

29.4.2007


na baven