Passion 2014
Invocavit

de welt is rund. de welt langt völlig ut.
krinkrund is se un vull vun dusend saken.
mehr bruk ik nich, kann gor nich allens maken —
de welt ümfaat mi ganz un afsolut.

de welt schenkt sik mi nieg mit elkeen dag.
knapp kann ik slapen, allens höllt mi waken
un glück is't, kann ik veel tosamenraken —
ik stah op fasten grund, mien egen flach,

un nix begrenzt mi as de horizont,
de alltied wieder warrt in ruum un tied.
wokeen seggt denn "de welt is nich genoog"?

se warrt ja mehr: wi drievt de welt ehr front
üm uns vöran, un elkeen richt is wied.
de welt langt ut. nix fehlt. ik kiek nich hooch.