To'n Johrswessel

vun Sabine Brauer

36 Stünnen
bit to d' Johrswende,
blot 'n Tohl,
nich mehr,
geiht nu toenn.
Un doch...
De Rucksack!
Noch nich packt!
Wat nehm ik mit?
Will holln, beholln,
will sörgen, besörgen
van Vandoog to d'Mörgen.
Gau raffen, nich gaffen:
Rin, blot herin,
Mien Wünschen, mien Drömen
bevör ik d't versühm —
dat gifft kien Torügg...!

36 Stünnen
no de Johrswende,
blot 'n Tohl
fung nu an.
Un doch...
De Rucksack!
Noch vullpackt!
Wat nohm ik mit?
Wull holn, beholln,
wull sörgen, besörgen
van güstern to d' Mörgen.
Pack ut...
Angst un Leed,
Arger un Verdreet —
Wat is dat mit mi?
Free finn ik
Heer, man blot bi di.

Uns Vader in Himmel, dien Naam sall heiligt worden.

Utsnitt Isenheimer Altaar

Doch wat mookt wi dor mit? Bi jede unpassende Gelegenheit ropen wi: "In Gotts Namen, o Gott, Harri Jasses nee, wat 'n Schiet!", un so wieder. Vader, help uns, dat wi Benüll kriggt un uns kloor word, wat wi dor van uns geven.

Dien Riek sall kommen,

Reken wi noch mit dien Riek? Willn wi dor overhaupt noch wat van weten?

Könnt wi hier all wat dorför maken, dat dien Riek baut word? Lat uns weten, wat wi för di döön können.

dien Will sall pesseren as in Himmel, so ok up de Eer.

Ut Wikimedia Commons

un vergeev uns de Schuld, as ok wi vergeven,
de an uns schuldig worden bünt.

De Worden gahnt uns so stur van de Lippen. Wenn du uns wirs so vergiffst, as wi uns Schüldigern vergeven, denn bünt wi ja alle mit 'nanner verlorn. Help uns, dat wi de annern vergeven könnt. Alleen schaffen wi dat wirs nich.

Un föhr uns nich Versöken,

kannst du dat denn? Is dat wirs so to begrippen, Vader, as dat dor steiht?

föhlmehr hool uns ut all Böösheit herut.

O Heer, haal uns ut de Schlamassel rut, in de wi uns immer weer rinrieden dönt

Immer weer pesseert dat, dat wi Saken maken, de wi gor nich doon willn.

Hieronymus Bosch, Dat Böse in „De Krüzigung“