Passion 2024
Karfriedag

vun Marlou Lessing

Dat is de Dag vun de Seiß, vun den Meihdöscher. Dat Koorn steiht regloos in de Sünn. De Seiß snitt. Dat Koorn fallt.

So leev hett Gott de Welt hatt, dat he sien eenzigen Söhn geven hett, dat jedereen, de an em glöven deit, nich verlaren geiht, sünnern dat ewig Leven hett.

Johannes 3, Vers 16
Wekensprook för Karfriedag 2024

Ut dat Saatkoorn sienen Dood keem de Plant — ut de Plant ehren Dood kümmt Leven för de Minschen un Deerten, de dat Koorn eten doot.

Leven kümmt ut den Dood. Wenn wat Nohrn warrt, mutt wat doodblieven. Hengaav — Hengaav ut den Buern sien Hand, Hengaav vun dat Saatkoorn sülvst an de Natuur, an dat warden Leven. Hengaav ut Leevde. Keen Hengaav gifft't ahn Leevde. Hengaav an de sülvst wählte Opgaav. Sülvst-Opgaav.

Twüschen uns un den Dood steiht nu Jesus. Hier wi, dor de Dood; Jesus in de Midd. Jesus de Middelpunkt. Jesus en Levens-Middel. En Levens-Middelpunkt. För uns, sien Minschen.