Dat kannst mi glööven!
"Säuk Freer"

vun Peter Kossen


To'n Anhören hier klicken:


Lesen deit Peter Kossen.


Dei Neijaohrsdag wett alle Jaohrn at "Weltfreersdag" begaohn. So nödig dait Freer, dat dei Anfang van 'n neie Jaohr allerwägens mit den gauen Willen taun Freer fiert wett. "Säuk Freer" — so heet dat Motto van 'n Katholikendag in 'n Mai in Mönster.


Dei Freersherold van Mönster 1648

At in dat Jaohr 1648 dei dartigjöhrge Krieg taun Ende köm, haarn alle begräpen: "Freer is dat beste van aale Deile!" Wo licht "dat beste van aale Deile" in Schöörn gaiht, veklaort us dei Naohrichten ut Korea, Syrien un Südsudan. Un uck woar nich schoaten wett, is dei Räde van 'n Hannelskrieg, "koolen Krieg" un "Nervenkrieg".

In dei Spraoke van d' Bibel heit Freer "schalom" un bedüürt mehr, at nich up'nänner lostaugaohn. Schalom mennt Läben in Sekerheid, is Fröndschup mit Gott. — "Wäst man nich bang!" Jümmers weer segg Gott dei Mensken tau: "Wäst man nich bang!" Freer kann d' kaomen un blieben ünner sücke, dei nich bange sünd vör Gott un vör'nänner. Freer is lebennig, veännert sien Utseihn, is kien Stillstand. Strien för dat Bätere, Taulustern, Lien aneinänner: so gaiht Freer. Dei Wäg taun Freer löpp liek dör d' Welt un liek dör 'n Warkdag. Mit sick sülwes Freer schluten: dat is faoken dat Schwäörste! Dei Freer binnen un dei Freer buten kaomt un gaoht taugliek.

Einen, wecke bold at kien ännern in Freer wör mit dei Mensken, dei Deierts un uck mit Gott, dat is dei hillige Franziskus. Franziskus har nicks, wat dei Lüe bange mök. Tau eine leipe Tied, at Christen un Muslime sick doot möken in 't hillige Land, fünd Franziskus in 'n Sultan 'n Frönd. "Ein annern Christus", dat wull Franziskus wän, un so hebbt dei Lüe üm seihn. Waohrheit is jümmers Leiwde, un Leiwde is Waohrheit, is kien Steen, den annern an 'n Kopp tau schmieten. "Du büss nich richtig, du läwst vekehrt!" — dormit fang Unfreer an. "Wäst man nich bang!" — Mensken fäühlden sick bi Franziskus frei, annoahm un stark genaug, ehrn eigen Wäg mit Gott tau gaohn.

Leiwe Tauhörers, ick schlao vör, vandaoge un jümmers weer för 'n Freer tau beern. Dat Gebett hölpt us, tau vestaohn: Alle Mensken sünd Kinner Gottes. Un wenn ick beer för dei, dei mi anwillt, nimmt dat wat van dei Bitterkeit tüsken us weg. Dat Gebett veännert taun minnste den, wecke beert. Beern kann dat Daun wisse nich ersetten, man dei Richte wiesen. Kien Freer oahne Gerechtigkeit, kiene Gerechtigkeit oahne Vergäben. Doräöwer mach ick düsse Wäken mit jau naohdenken.



"Dat kannst mi glööven!" is eine plattdütschke Andachtriege in't Radio (NDR),
dei siet den 1. Advent 1953 staodig in't Programm staiht.
Tau Tied schriewet hierför rund 75 evangelschke un katholschke Theologen
staodig Andachten up unnerscheidlicket Nedderdütschet un
Oostfäölschket Platt. Sendet werd maondaogs bit freidaogs
üm 14.20 Uhr van NDR 1 Neddersassen.

Bi us up plattpartu.de finnt man nu utsöchte Bidräge van disse Radiosendung.


21.10.2018


na baven