Passion 2023
Lätare

vun Gertrud Everding

Frei di mit Jerusalem!

Jesaja 66, 10

Wat is denn dat för'n komischen Passions-Sünndag?

"Frei Di mit Jerusalem!" schreet de Lüü — nee — dat geiht doch nich! Sünd de verrückt? Allens is doch so grulig un ok so trurig op uns Eer! Weertschaps-Krise, de Lüü hefft keen Arbeit — Krieg un Moord is överall. Wi wüllt hüüt man bloots wenen un klagen! —

Nu holl avers Stop — hüüt is würklich nix mit Fasten un Wenen!
Uns Gott hett uns nich alleen laten un he blifft ok jümmers bi uns. Dat is doch kloor! Dorüm singt wi un freit uns hüüt den ganzen Dag, wieldat wi al nu weten: Gott föhrt uns Elend seker un goot to Enn. He hett mit uns nix as Leev in Sinn.

Un Du? Hest Du ok Leev un Warmnis in'n Sinn? Wat Gott deit, dat is best. He töövt aver so bannig lang al op, dat wie em ok leev hefft. Kann ja woll nich ween, dat een Minsch füünsch ist to een Vadder, de em in de Arms nehmen will. Denn warrt dat natüürlich nix mit Kind un Vadder. Denk maal över na — snack maal mit Gott — Beden meen ik — Gott töövt al op Di!

Jo — un denn is nu ok noch Fröhjohr — Krokus un Sneeklocken blöhn man so — dat is 'ne Pracht! Meist hefft wi hüüt ok noog to eten. Wi köönt denn doch dankboor ween. Du — sing doch mit mi!

Ik kann hüüt eenfach nich an'n Dood un Starven denken, denn ik glööv dat: Gott bringt allens goot to Enn. He wischt siene Kinner de Tranen af, dat se wedder lachen köönt.
Ganz nau weet ik dat: Gott will, dat sien Kinner blied sünd.

Gott, de gode Harder