Dat kannst mi glööven!
Wenn Kopp un Harte äöwerloopt

vun Hubert Looschen

To'n Anhören hier klicken:

Lesen deit Hubert Looschen.

Ick hör immer wedder van Lüe, dat se nachts nich gaut schlaopen käönt. Ehr Kopp is ganz vull, väles kummp ehr in'n Schlaop nao. Nachts denket sei aale nao, wat annern Dag aals anstaiht, wat d'r tau daun is und off man dat woll aale uppe Riege krigg. Kopp un Harte sünd vull. Wenn man dat doch einfach maol äben affstellen kunn!

Dor wör maol ein Professor, 'n klauken Kopp. Hei wüssde väl, har aower uck noch 'ne ganze Riege Fraogen. Hei hörde van einen Zen-Meister. Den hölln dei Lüe för besünners klauk. Dei wüssde aals un bleew d'r ganz ruhig bi. Den wull dei Professor beseuken. Hei wull üm nao Gott fraogen, nao dei Unendlichkeit, nao Meditation un Zen un 'ne ganze Riege annere Saoken.

Dei Meister hörde sick ruhig an, wat dei Professor van üm wull. At dei Professor aale Fraogen los worn wör, sä dei Zen-Meister: "Professor, du häss 'ne lange Reise achter di, du süss meue ut. Ick kaok di 'ne Tasse Tee."

Dei Professor kunn gaor nich afteuben, bit dei Meister wedderköm. Dat dürde üm rein tau lange. Hei wör ja uck nich taun Teedrinken kaomen! Schull dei Meister gor nich so klauk wäsen? Bruukde hei Tiet för dei Antworten? Wör siene lange Reise umsüss wäsen?

Dei Professor stünd all wedder up, wull weg. Do köm dei Zen-Meister trügge mit 'n Tablett un den frischken Tee. Den Tee kunn hei noch woll drinken, aower dann wull dei Professor doch gaohn. Hei harr kiene Tied mehr. Dei Zen-Meister nöhm dei Kannen, gööt dei Tasse bit baoben hen vull. Dei Tasse löp äöwer, dei Unnertasse wör uck all vull.

"Wat möcks du dor, du Däöspaddel?", schüllt dei Professor den Meister ut. "Süss du nich, dat dei Tasse all lange vull is un äöwerlöpp?"
Dei Meister griende sick ein'. "So ist dat uck mit dienen Kopp un dienen Verstand. Dor ist gor kien Platz mehr inne. Wenn ick di wat sägge, kanns't' nich beholln. In dien Kopp is jüss so väl Platz at in diene Tasse. Gaoh wedder nao Huus, maok dien Kopp los un dann kumm wedder."

Leiwe Tauhörerinnen un Tauhörer! Wo sütt dat in jauen Kopp ut? Mäöt ji den uck maol los maoken? Mien Kopp häff dat immer wedder maol nödig.

Bi us up plattpartu.de finnt man nu utsöchte Bidräge van disse Radiosendung.