Dat kannst mi glööven!
Dat Haarte un siene Naarwen

vun Hubert Looschen

To'n Anhören hier klicken:

Lesen deit Hubert Looschen.

Kann use Haarte Naarwen kriegen? Wenn dei Doktor di unnersöch un du häss ein' Herzinfarkt hat, sütt hei dat fort. Aower dei Naarwen, wor ick van schnacken will, sütt kien Doktor, kanns nich up't Röntgenbild seihn — un doch sünd se dor.

Twei Fründe güng'n dör 'ne Wüste. Dei Hette mök ehr dull un gneisig. Dei beiden kömen in'n Striet. Dei eine schlög den annern midden in't Gesicht. Dei, wecker den Schlag krägen har, wör beleidigt, aower hei sä nix. Hei kneiede sick hen und schreew dissen Satz in'n Sand: Vandaoge häff mien beste Fründ mi in't Gesicht schlaon!

Dei beiden güngen wieder un kömen in eine Oase. Dor sprüng'n se in't Waoter, wulln 'n nao dei Hette inne Wüste ein Bad nähmen, sick afkäuhlen. Dei, wecker inne Wüste schlaon worn wör, sackte upmaol weg in einen Modder. Den kunn man nich seihn. Hei sackde immer deiper. Hei bruukde Hülpe, änners güng hei unner. Dei Fründ trück üm in lesden Oogenblick wedder rut, wüdd so taun Läwensretter. At dei Vermalörte wer beinig wör, nöhm hei einen Stein. Dor ritzde hei rin: Vandaoge häff mien beste Fründ mi dat Läwen rettet.

Dei Fründ wunnerde sick dor äöwer. "At ick di schlaon har inne Wüste un du beleidigt un mi dull wörs, häss du dat in'n Sand schräwen. Nu ritzes du wat in'n Stein. Wat schall dat?"
"Wat du in'n Sand schriffs, dat bliww nich lange. Dei Wind waiht den Sand un den Satz drocke weg. Saoken, dei di dat Läwen schwor maoket, schull man am besten drocke vergäten. Annere Saoken moss beholln. Du häss mi dat Läwen rettet, dat vergät ick di meläwe nich. Dorüm häbb ich dat in dissen Stein ritzet."

Leiwe Tauhörinnen un Tauhörer!
Wenn ein' wat Leipes passeiert, wenn einer di wat Leipes dait — dat vergät man drocke. Häff einer di Gaues daohn, dat beholl. Wenn dat Haarte all Naarwen krigg, dann will ick dei upsporn för Lüe, dei mi gaut wäsen sünd. Dat Leipe laot us man drocke vergäten.

Off mien Haarte woll masse Naarwen häff un viellicht vandaoge noch eine neie krigg?

Bi us up plattpartu.de finnt man nu utsöchte Bidräge van disse Radiosendung.