Losungen

vun K.-H. Sadewasser

Wat ene Losung in de DDR-Tiet wier, weiten wi doch all noch: Dat wiern Spröök gegen de bösen Kapitalisten in'n Westen un för ene gode sozialistische Arbeitsmoral hier bi uns. Se hüngen — as Schiller upmaalt — över'n Kohstall, an'n Konsum un neven dat Stratenkrüüz. Dat geev so veel dorvun, dat wi gor nich mihr richtig henkeken hebben.

Dat gifft ok ene Losung, de sik Lüüd in'n Wedderstand gegen dat Naziregime verafreedt harn un doran wüssen se denn, dat se bi de richtige Person wiern un dat man sik up den annern dull verlaten kunn.
Nu gifft dat noch ene ganz anner Ort von Losungen — al 270 Johr lang. Dat sünd Sprüch ut de Bibel, de in Herrnhut bi de Brüdergemeinde würklich utloost warrn för jeden Dag vun en ganzet Johr. Un dit Losungsbook warrt in 50 Spraken översett un leest — jeden Morgen werrer nieg.

De Losung för den 26. Januar 2003, den Dag, dat ik düt schriev, steiht bi de Psalmen upschreven:

"Gott sien Grull duurt man enen Ogenblick, man sien Gnaad solang een leven deit. Un wo an'n Avend Tranen sünd, dor is an'n Morgen blots noch Juuchhein."

Dit is doch en Woort, dor kannst' an marken, dat du an de richtig Adress büst — un dor kannst' di denn ok up verlaten. Gott sien Leef is üm di rüm, wenn di dat goot geiht un dien Tranen wiet weg sünd, aver Gott steiht di ok an de Siet, obschoonst di dat Juuchhein, dat Freuen, so richtig vergahn is: Wat sall warden mit de Arbeit un de Familien, mit de Gesundheit un dat Öller, mit Freden un Krieg?

Dor warrt sik ümmer werrer wat an ännern könen, männichmal vun enen Avend bet an den annern Morgen. Gott sien Leev aver, de wohrt dat ganze Leven lang, so as dat is, un de driggt di ok dörch dien Starven.

De Losungen warrt elk Johr vun de "Herrnhuter Brödergemeen" opstellt. Dorbi warrt ut mihr as 8000 Sprüch ut dat ole Testament för elk Dag een utloost; dorto warrt denn en passen Spruch ut dat Niee Testament un en Vers orr Gebet utsöcht. Dat Ganze kümmt as lütt Book rut (kost man bloots 3,70 Euro) un warrt in mihr as 50 Spraken översett. — De aktuelle Losung köönt Se elk Dag op www.losungen.de online lesen!

Nikolaus Graf Zinzendorf nöhm al 1722 de "Böhmschen Bröder", evangeelsche Bröder un Süstern, up de em hören Eck in Schutz vör de kathoolschen Habsburger. Se müßten rietut nehmen un fünnen in Nikolaus sien Rebett Rooh.
De so entstahn Brödergemeinden sünd bit hüdigendags levig Christengemeinden, ok in Hamborg un Lübeck un annerswo. In veele Hüüs findst up uns Eck de "Losungen".