Luciakroon
Dei schwedsche Lichtenkönigin Lucia

vun Behrend Böckmann


Bi uns Nåwern in'n Nuurden hett sik äbenso as bi uns Wihnachtsbruk ut heidnisch Vörtieden hollen, un Nieges keem nå Christi Geburt hentau. Un so as hüt bi uns Advent un Wihnachten, Nikolaus un Wihnachtsmann 'n Rull spälen, sünd dat in'n Nuurden dei "Lichtenbrut" Lucia, dei Ünnerierdschen, dei Julebuk ('n Zägenbuk ut Stroh) un ok dei Wihnachtsmann.

Allens füng wull dormit an, dat nå 'n ollen julianschen K'lenner all in't Middelöller un tau Urtieden dei Wintersünnenwenn' an'n 13. Julmånd fiert un disse Dach ok bibehollen wür, as af 1752 in Schweden nå den gregorianschen K'lenner räkent wür. Up dissen Dach wür låters dei Gedenkdach för dei hillig Lucia lecht, doch ihrer dat so keem, hemm' an dissen Dach dei Ünnerierdschen un dei Düwel ehrn Späuk mit dei Minschen dräben. Vör gaut hunnert Johr wür dei Späukdach denn in 'n Hilligenfest ümwannelt, un dat wür denn in't 20. Johrhunnert dat hütig Lucia-Lichtenfest as dei Anfang vonne Julfesttiet.


Dei Hillige Lucia. Op den Töller driggt sei dei Ogen, de s' ehr utreten hemm. Ja, dormalen güng man doch bäten rustikal vör!

Dei olle Bruk von Fiern tau dei Sünnenwenn' vermengeliert sik hier mit dei Geburt von't Jesuskind in'n Stall tau Bethlehem un den Gedenkdach vonne hillig språken Lucia von Syrakus (283-304), dei sik ut Leif tau'n Heiland nich verfriegen leet un dorför dull malträtiert wür. Vertellt ward, dat sei dorför, dat's sik ganz un gor den Globen hengeef, väl Marter un Pien uthollen mösst un ehr dei Ogen utstäken un dei Kähl dörchschnieden wür.

Vertellt wür œwer ok, dat Lucia giern mit beide Hänn' Gåwen verdeilt hett un sik 'n Lichtenkranz up'n Kopp setten däd, dormit's dorbi wat seihen künn. Un den Lichtenkranz up'n Kopp hett 'n sik in Schweden taun Ogenspeigel för't Luciafest nåhmen.

Dat Gedenken anne hillig Lucia ward Brukdaum, un väle jungen Mäten drömen dorvon, dat's dei schönste Lichtenbrut warden, dei 1927 taun iersten Mål söcht wür. In Fomilien mit Mäten ward dei öllst Diern as Lichtenbrut mit 'n langet witt Kleed un 'n rodet Band üm'e Talje un 'n Lichtenkranz up'n Kopp utstaffiert, dei denn as "Lussebrud" Öllern un Geschwister wecken deit. Dor, wo sik disse Lussebrud ok buten wiesen deit un taun Beläwnis för all warden sall, gåhn lüttere Mäten mit Lichten inne Hänn', Stiernenjungs, Ünnerierdsche un Päperkaukenmännings in'n Pulk achteran. Dei schwedsche Wihnachtstiet fangt so mit dat Lucia-Lichtenfest inne Fomilie an un schwappt nå'n Kinnergorn, dei Schaul un den Arbeitsplatz œwer. Dat gifft lütte Safrånsemmeln, dei sik "Lussekatter" näumen, man drinkt den Schwedenpunsch "Glögg", man singt Lucialeeder un söcht dei schöönste Lichtenkönigin Lucia ut'e ganze Ümgägend.


Lucia-Prozession. Bild SunMaria1/Wikimedia Commons

So as dei Lichten up'n Kopp wägen dei Füergefohr all lang gägen LED-Lichten uttuscht würn, hett sik ok dat Brukdaum ut heidnisch un christlich Tieden verännert un sik äbenso an dei hütig Tiet anpasst. Un so warrt sik dat ok in Taukumst wiederentwickeln — is tau höpen.

Un wat wier dat Lucia-Lichtenfest åhn dat Lucialeed, dat jedet Kind in Schweden singen kann!! Ut Neapel kåmend, hett dit Leed af 1850 dei Runn' so måkt as "Jingle bells" hunnert Johr låters bi uns. Man singt vonne Düsternis in Stuf un Stall, dei dörch den Lichtenkranz in't Hoor vergeiht, un dorvon, dat dörch Santa Lucia dei Düsternis ennen deit un dei niege helle Dach von'n Häben föllt. Von Schweden ut hett dat Lucia-Lichtenfest ok in Dänmark, Norwegen un Finnland Faut fåt't, un in ganz Skandinavien singt man wull œwerall, wenn ok ümmer 'n lütt bäten anners, dat Lucialeed.


19.12.2022


na baven