„Wat mit Hannen maakt is, dat sünd keen Götter“
Apostelgeschicht 19,26

vun Rudi Witzke


Cern UA 1, Foto: Mark Williamson, Wikimedia Commons
Cern UA 1, Foto: Mark Williamson, Wikimedia Commons

Wat köönt wi nich allens! Schient so, as weern de Minschen tövern Wunnerwarker. In Genf hebbt se gistern een 27 km langen Tunnel inweiht. Dor willen se Saken maken, vun de wi slichten Tüffelfreter keen Ahnen hebbt. Se willn lüttinglütte Deile, Protonen seggt se woll up, in en runden Tunnel mit Lichtgeschwinnigkeit rümsusen laten. Un denn willn se den Uurknall namaken, mit den uns Welten entstahn is. Wo dat? Se jagen lütte Deile in Gegenricht. Un denn stöten de villicht tosamen. Un dat mit Larm und Karacho, den Uurknall. Un denn hebbt se dat schafft: Uns Welt noch maal schöppt un sik mit Vadder Gott up een Treppenafsatt stellt? „Süh! Nüms is grötter as wi!“

In Indien hett een Deern solk Bang kregen, dat bi dat Gefummel an dat, wat uns Welten tosamenhöllt, in Genf de Welt unnergahn kunn. Se hett sik gistern, an’n 10.09.2008, ümbröcht.

In de Losungen stünn hüüt dat Woord: „Wat mit Hannen maakt is, dat sünd keen Götter.“

Mi keem Jona in den Sinn, de vun Vadder Gott Order un Bescheid kreeg, de klauksten Lüüd in sien Tiet in Ninive maal de Leviten to lesen. Wokeen so överspöönsch is, mag hei noch so veel trecht kriegen, den ward Gott wiesen, wo de Minsch sien Scheiden un Grenzen hett.

Wenn he dat övermöödig minnacht, denn lett Gott Ninive in Füür un Asch und Steinbrocken un Afgrünnen kamen un de Stadt ünnergahn. „Gah loos, Jona, segg dat de klauken Lüüd vun Ninive!“ — Jona harr partut keen Lust, solk een Bott in de rieke Stadt to bringen. Vadder Gott kreeg em aver in de Plicht.

Un so marscheerte Jona vun Jaffa dörch de Wösten hen na Ninive un dää, as em updragen. Aver allens keem anners. Dat heff ik ut de Bibel uns maal in een Översetten upschreven. – Wokeen dat nau leest, de war faststellen, dat an’n Sluß kein Woord seggt ward, woso allens anners keem. — Woans ward dat mit de Anter sien, wenn twei Protonen in Genf upeinannerballern? Blifft dat dorbi?

Ninive. Foto: Wikimedia Commons
Ninive. Foto: Wikimedia Commons

Jona paßt dat nich — aver Gott wiest em torecht.
Jona harr, as em updragen, de Lüüd vun Ninive de Bott vun den Unnergang vun de Stadt bröcht.

Rizinus. Foto: Rudi Witzke
Rizinus. Foto: Rudi Witzke

Rizinus. Foto: Rudi Witzke
Rizinus. Foto: Rudi Witzke

„Do leet Gott enen Rizinusboom wassen. De keem in de Hööcht un wörr so groot, dat he Jona över den Kopp Schatten geven kunn un so em vun sien lege Luun afbringen dee. Un Jona freu sik bannig över den Rizinus.

Rizinus. Foto: Rudi Witzke
Rizinus. Foto: Rudi Witzke

As dat aver an den neegsten Morgen even hell wörr, leet Gott enen Worm kamen. De freet den Rizinus an, un he dröög ut.

Wurm. Foto: bbroianigo, Pixelio
Wurm. Foto: bbroianigo, Pixelio

Un as de Sünn upgüng, leet Gott enen glönigen Oostwind weihen; un de Sünn steek Jona baven up den Kopp, dat he sik beswögen dee. Do harr he dat satt un leng na den Dood.

He see: ‘Beter dootbliven äs noch wieder leven!’ Gott aver see: ‚Is dat wirklich recht, dat du so vertöörnt büst, un dat wegen den Rizinus?’ Do see he: ‚Dat is wull klaar! Ik heff dar allen Grund to, dat ik up den Dood vertöörnt bün.'

Gott see: „Du jammerst um den Rizinus, wo du keen Hand för röögt hest, un uptrocken hest du em ok nich. In een Nacht is he worrn un in een Nacht vergaan. Un ik schull keen Erbarmen hebben mit de grote Stadt Ninive, wo över hunnertuntwintig Dusend Minschen leevt, de rechts un links nich ut’n een holen künnt.
Un boven tau all dat leve Veih?“

Översetten vun Johannes Jessen

Nu bring man maal de beiden Geschichten tosamen. Dat Grüveln lohnt sik. Müßt villicht ok rundrüm in een Denkkarussel denken, aver nich gau, schöön suutje. Un villicht ok üm de Eck.

Denn is Swatt Witt un Witt Swatt! Denn weer dat villicht een Segen west, de Sövenmaalklauken ...Ach, terbreek Di man maal sülven en beten den Kopp orrer pack mien Spinnerie to Siet.

Rudi Witzke
11.09.2008

Mien Fru Inge kickt mi meist över de Schuller, wenn ik wat schriev. „Hest de ’Losung’ vun 11.O9. aver nich to Enn leest, dat paßt to dien Grüveln. Un se legt mi den 3. Deil vun de Losung hen:

„Wer vermag noch zu lesen die Handschrift des Schöpfers? Metallene Götter beten wir an und wundern uns noch, wenn wir uns unbehaust fühlen auf dieser Erde. O Gott, zugrunde gehen deine Menschen in ihren selbstgemachten Wüsten. Nur dein Erbarmen kann uns retten.“

Sabine Naegeli

Rizinus. Foto: Rudi Witzke
Rizinus. Foto: Rudi Witzke


14.9.2008


na baven