In'n Schadden vun't Hillige

vun Rudi Witzke


So in sik kiehrt kann hei sien, de Felsendoom in Jerusaleem, un dat Mystische höden. Över Hilliges ward Hilliges stülpt. Ünnen liggt en groot Fels, up den seiht de Moslems de Hoofspuur vun den Schimmel, mit den Mohammed in'n Himmel sprungen is. Dat is ok de Steen, wo Abraham Isaak oppern wull. De Juden harrn den Barg, de ok en Dööschsteed weer, köfft un ehre twei Tempels na eenanner buut. Ehr Hillige Barg!

Un dor sitt's denn in'n Schadden, de Larm vun de Stadt is kuum noch to hören. Morgen staht sik denn villicht nau hier wedder Moslems un israeelsche Suldaten gegenöver un gludert sik böös an. Wenn't man dorbi bleev!

Wi hebbt up vele Steden vun den Barg Moriah vele Stunnen tobröcht, seten, keken, dröömt. Dat is as ut en anner Welt — un doch unvergänglich Gegenwart. In den Reisföhrer stünn, een schull man beder nich achter den Felsendoom in den "Park" gahn, wo Palmen ok schönen Schadden geven. Dor sitten araavsche Mudders mit'n Butt Kinner. So en Oort Picknick maakt se dor.

Un nu kunn dat sien, dat Ornungskräfft — araavsche? — een de Polizei övergifft, de een een Nacht in Sekerheit behöllt. Wenn kievig büst orrer wat dwatsch utsühst, kann dat ok wat länger duurn. Wi weern drei orrer veer Nameddage dor — un hebbt dat mit de Ornungskräfft eerst nahsten maal leest.

De Steed is as de Grote See! Se kann even liggen, licht schwunken, sieden Winnen gahn behootsaam röver. Un se kann toven, brüllen un krachen mit teihn Meter hoge Wellen, de daalstört.

De Barg Moriah un de Grote See! Un villicht ok uns Leven so?


16.6.2019


na baven