Weest ja nich bang!

vun Pastor Hans-Eberhard Schulz

Wokeen truut schon disse Bott? Herders snackten dorvun, avers wat gellt schon en Bericht vun Herders! "Freugt juuch! Juuch is hüüt de Heiland born."

Wiehnachtsikoon

De Idee vun een Gott, de een mit Jesus Christus verbinnt, is Gott as Vadder, de de Swaken leiv hett un sogor üm een enkelt verlorn gahn Seel de ganze Haud daun lett, wat se will. —
De Idee vun Gott, de een hüüt mit de Salafisten in Verbinnen bringt, is dorgegen de Djihad.

In'n Stall born, dor harr ok woll de Mudder ehr Twievel, wenn ok mit röögt Hart. Up de Flucht müßten se ut ehr Heimatland gahn.

För de Herren vun den Jerusalemer Tempel wöör disse Jesus to en rood Dauk. Al bi den iersten Tempelbesöök in Jerusalem makte Jesus sik as lütte Buttscher mit sien klauke Fragen verdächtig. Aver nu as upwossen Kierl!

Jacob Jordaens: Jesus diskereert mit Pharisäern

Sien Familje harr hei in Nazareth in Stick laten, "Wokeen sünd mien Gewister? De, den Willen vun Gott daun!"
Un woran dacht Jesus, wenn hei vun Gott spröök? An Vergeven un an Gott, den Vadder. Wat för Ketterie! Seggt doch dat teinte Gebott, dat een sik vun Gott den Herrn un Schöpper keen Bild maken schull.

Un woans Jesus sien Leven föhrte un wat hei sik rutnehm...! Hei eet mit Töllners un Sünners. Mit Fruuns, de en slechtern Raup harrn, snackt hei nich bloots, hei bidd se sogoor üm Wader.
Hei lett sik vun en stadtbekannte Sünnerin mit ehr Tranen de Fööt waschen un sik sogor de Fööt salven. De eenzige Salvung, de hei kreeg.

Un den nöömt wi as sien Naamsdreger "Christus", den Salvten!

De Hööcht vun Inbillung is dat denn, dat hei seggt hett: "Wokeen mi süht, de süht den Vadder!"

So üm un bi vör 400 Johrn hebbt wi, sien Anhangenden, dat de Welt schreven geven: "Jesus von Nazareth ist Wahrer Mensch und Wahrer Gott!"

Krüüzigen. Bild Cornelis de Vos

Un dat Jesus de Minsch schoon as dat Word vun Gott vör de Tiet un bit in de Ewigkeit mit Gott weer, versteiht kein Minsch, as keen Minsch Gott sien Gedanken nich na-denken kann?

Dissen Jesus vun Nazareth kunn dat Establishment nich hennehmen. Hier entstünn en gefährlich Konkurrenz. Wat en Glück, dat dat dat Verbott vun Gottschandeern un en banghaftigen Prokurater gifft, na de dat keen Fienden vun den Staat geven dörft. Wat to veel is, is to veel. De in en Stall Borne hett ünner oordig Börger nix to söken: An't Krüüz mit ehm — mit ehm — mit ehm!

Avers sien Leiv sprüng up de över, de up en nieges Leven tövten. Se güngen in den Deinst vun de Leiv un leten sik vun den Doot nich verfehrn, bit ok de Kaiser in Rom lütt bigeev. De religiööse Rebell wöör de Staatshillige. In sienen Naam wull man gegen de Barbaren ut den Norden winnen un mit dat Word "Gott" up dat Koppelslott de Welt ünnerkriegen.

Nu is aver dat Heidendoom mit Dannenboom, Osterei in'n Koppswiem uperstahn. An de Steed vun dat minschlich Licht "Jesus vun Nazareth" strahlen in de Hüüs un an de Hüüs un up de Bööm un Strüker nich to tellen Lichter, för de de Strom ut de Steckdoos kümmt.

Bild Arne Hückelheim/Wikimedia Commons

Un de Dunner vun "Prost Niejohr", de mit Schwefelruuk de legen Geister verdrieven schall, is ok al ünnerwegens. Gold, Weihruuch un Myrrhe kriggt een hüüt noch in möhsaam Arbeid vun landloos worrn Minschen. Se geven de Tempel un Palääst Gleem. Preister un Herrscher deilen sik de Macht mit de Konzerne un dat Kapitaal.

Na tweimal dusend Johr warden jümmer noch Kinner utpowert, Fruuns missbruukt, Arme mit Troost afspiest. De Frieheit vun en Religioon, dat allgemeine Preisterdoom vun de Leiv, stahn hüüt jümmer archaisch Traditschioonen in'n Weg.
Dat wohre minschliche Licht — Bildung, Demokratie un Minschenrechte — ward vun sozialistische un nationale Ideologien, Wassdoom un Konsum to't Flackern bröcht.

Dorüm:

Hefft keen Bang,
den Weg vun de Leiv mit Christus to gahn. —
Ora et labora.
Denk na un pack an.