De Noordkark kümmt to Pingsten!

De Evangeelsch-Lutherschen von Meckelnborg, von Pommern un Noordelbien leggt ehr Karken tosamen!

De Noordkark (hellgröön)

Dat is nu de eerste Bund twüschen Oost- un Westkark. Scheun finn ik dat! Nu is Schwerin, Greifswald un Rostock noch veel nähger as verleden Tiet an uns rankamen. Eene Bibel harrn wi jo al, aver wi leest de nich blots, wi sett uns dorför nu ok ganz dicht bienanner. Von Usedom bit Helgoland hett de Luthersche Kark von Pingsten an den Namen Noordkark. Bit düsse Daag hett dat sowat nich geven. Dat is'n echten Geburtsdag!

Stralsund, St. Nikolai. Foto Klugschnacker/Wikimedia Commons

Al von de Reformatschoonstiet her harr jedes lütte Land sien egen Kark. Un Düütschland weer jo so'n richtigen Flickenteppich mit all sien Fürsten un Grafen. Jeder lütte Adelige wull 'n beten wat von Düütschland afkriegen. Alleen de Kaiser harr över dat Ganze to bestimmen. Un de weer jo ok de Böverste von all de Länner un Karken in sien Land.

As Luther obstinaatsch worrn is, wegen den Ablasshandel un so'ne Oort Saken, wo een sik de Sünden vergeven laten dröff, wenn he dorför noog Geld betahlen kunn, is he in Acht un Bann kamen. Erst poor Johr later kunn he von de Wartburg wedder ünner de Lüüt gahn.
Dat hett lang duert, bit sik eerst alles beten beruhigt hett.

Un denn keem dat to en niegen Besluss: "cuius regio, illius religio". Dat weer latiensch un heet: wessen Gebiet, dessen Religion.

Weer de Herzog evangeelsch, weern ok de Minschen dor ganz von alleen evangeelsch, un weer de Fürst en Kathoolschen, müssen sien Lüüt dat foorts ok ween. Jedes lütte Land harr sien egen Kark, sien egen Gloven un ok sien Bischop, as ok sien egen adeligen Herrn, un so is dat noch lang bleven. Mennigeen Buer hett domaals mit siene Familje bi Nacht un Nevel Huus un Hoff wegen den Gloven verlaten un is in dat Nachbarland utneiht.

De Barther plattdüütsche Bibel vun 1588

Hüüt warrt wegen den Gloven keen Minsch mehr dootmakt. De Lüüt sünd beten wat tolerant worrn. So blödig güng dat jo ok nich wieder.

Adolf Hitler hett dat denn 1933 mit de Evangeelschen besünners plietsch makt. De Nazis hefft sik foorts de ganze Saak ünnern Nagel reten, un dor geev dat keen Wedderwöör. Snack een Paster gegen de slimmen Verbreken von de Nazis, de keem in'n Knast or woor sogoor dootscheten, ganz egaal, ok wenn he noch so'n goden Paster weer. Un de eenfachen Lüüt güng dat natüürlich ok nich beter.

Inselkark Hiddensee Kloster mit Engel an de Deck. Foto Metzenr/Wikimedia Commons

Na den tweten Weltkrieg keem denn wedder en ruhiges Leven, tominnst för den Westen von Düütschland. In'n Oosten wull de Partei von'n leven Gott partout nix mehr weten. Se meen meist, dat is Volksverdummung.

Aver hüüt na de Weddervereenigung gifft dat nu 22 Landeskarken bi uns, un de höört al tosamen to de EKD, de Evangeelsche Kark in Düütschland.

Dor gifft dat to'n Bispill de Evangeelsche Landeskark von Anhalt, de Evangeelsche Landeskark von Baden, de Bremsche Evangeelsche Kark, de Pommersche Evangeelsche Kark, de Evangeelsch-Luthersch Landeskark von Meckelnborg, un wat se all heten.

De Evangeelsche Kark von Hamborg is 1977 al mit de Kark von Sleswig- Holsteen tosamengahn, un denn heet se Kark von Nordelbien worrn. Anfangs hefft de Lüüt dat gor nich so scheun funnen. Wo kunn so'n Millionenstadt as Hamborg mit so'n Land, as dat Sleswig-Holsteen weer, tosamengahn? Wat is Kiel un wat is Lübeck gegen dat grote Hamborg? Allens in een Pott? Kemen de Christen all to ehr Recht? Warrt de sik woll verdregen? Aver nu hefft wi uns an wennt. Is doch eentlich ok goot!

Klosterruine Eldena. Foto Falo Sieker/wikimedia commons

Un Pingsten kümmt för de Evangeelschen de Noordkark. Een Meilensteen! Na ja, wi warrt dat al kriegen. De Tiet hett sik ännert, un Christenlüüt gifft dat ok nich mehr so veel as fröher. In Hamborg schoon gor nich. Dor gifft dat al mehr Moslems un Hindus un wat weet ik, un natürlich ok vele Lüüt, de mit Religion nix mehr an Hoot hebben. Hüüt makt sowoso jedereen wat he will. Geiht in de Kark, geiht nich in de Kark, geiht in'ne Moschee, geiht in'n Wald, is katoolsch, is evangeelsch, is Baptist or wat anners un oft is he ok gor nix.
Nu hukt wi Evangeelschen uns dicht tosamen.

Hallenkark Garz, Usedom. Foto Rolf Schulte/Wikimedia Commons

Un wi warrt dat ok schaffen mit all de Opgaven, de in Tokunft op uns luern. Kark, dat is dat Schipp, wat sik Gemeinde nennt, nich blots een Huus, nich een Minsch alleen, nee, wi höört all tohoop! Wi, as Noordkark! Mag de leve Gott uns dorbi hölpen, wat de Saak för uns to'n Segen warrt. Dorför wüllt wi all Daag beden.

Gott seggt to uns:
Laat di keen Angst injagen un verleer nich de Kuraasch, denn ik, de Herr, dien Gott, bün bi di, wo du ok hengeihst!
(Bibel, Oles Testament, Josua Kap. 1, Vers 9)

Na denn! Un Pingstsünndag fohrt wi na Ratzeburg!

Scheune Pingsten, leve Lüüt!
Hartlichen Glückwunsch to'n Geburtsdag, leve Noordkark!

Klicken Se den Link hier an! Dor köönt Se allens nalesen un in Roh dat Programm bekieken.
Denn weten Se, wat in Ratzeburg allens loos is.

Kark in Borth, Vörpommern

Keitum up Sylt

Wenn dat nich bloots vunwegen dat Sporen
bi de Karkenbewirtschaftung un Verwaltung is,
also nicht nur eine "Haushaltsfrage" ist,
denn laat mi een Droom un Wunsch hebbn
vun een Himmelriek, dat hier in uns Noordkark
al uns sien Teiken un Sporen wiest:
Överall finndt wi denn Bräuder un Süstern,
de ünner de Füürtungen un dat Licht vun Pingsten leven.
Se bekennen sik dortau un leven so mit uns.
Se hööpt up dat Sekersien, dat HEI bi un is un blifft,
se verstaht dat allens un leevt in liek Wies.
Överall kannst an de Döör kloppen
ahn Ängsten, dat du an "Fortschrittliche" geraden büst,
de de Jugendweihe hebbt un dormit klauk un trecht sünd.

Dat is tominnst mien Droom
vun een Christengemeinschop vun Vitte
bit hen na'n Michel in Hamboorg:
Een Rebett, wo de Wöör vun den Pastoor vun de Hauptkark in Hamborg
un de Dörpskark Abtshagen in'n Kreis Grimmen liek veel bedüden.

Karkenruin in Rolofshagen, Vörpommern

Nikolaikark in Flensboorg

Dat dat en Eck is,
wo all Plattdüütsch verstaht,
een Mudderspraak för veele siet ehr Levenstiet,
dat is en Freud för uns boventau
un uns ool Bibel in Borth,
vun de 1588 wohrhaftig 1000 Stück
druckt un utmaalt wörrn.

De Barther plattdüütsche Bibel vun 1588

Wenn wi uns iehrlich ünner sien Wort stellen
un versäuken, dorna to leven,
denn so is uns Land för Kinner un Enkel un uns
nich miehr de "heidnisch" Norden.


Dom in Güstrow

Dom in Schleswig

Bloots laat uns jümmer wedder tosamen beden, dat de Hillig Geist ünner uns leven deit un blifft un sien Wark deit.
Denn sünd wi wohrhaft een groot Noordkark vun Christenlüüd.

So laat uns morgen
den iersten groten Gebortsdag fiern,
den Gebortsdag vun de Noordkark.

Pingst-Ikoon