Passion 2014
Oculi

na baven... gaht to'n eersten maal mien ogen...
de himmel — heet't — is nix as illusioon...
un liekers krieg ik hier keen luft mehr ohn.
hett mi de himmel — orr de welt bedrogen?

dat is en tüünkraam, hirngespinst, en droom —
so veel gifft dat dorvun, as't minschen gifft —
gedankenblasen, de en stoot verdrifft —
un keen hett mit de annern wat to doon ...

dat schüddelt mi as spiet. dat gifft keen sinn.
ik geev dat op. dat brukt keen sinn to geven.
de welt fraagt bloots, wenn't ehr nich passt, na grünn.

ik föhl bloots, dat ik al mien ganzes leven
en drepen heff — dat ik verafreedt bün.
ik weet nich, wenn — ik glööv bloots, ik gah hin.