Passion 2023
Oculi

vun Gertrud Everding

Miene Ogen kiekt meist na Gott hen.

Psalm 25,15

Un wat deit Gott?
He hett Jesus in Düstern in Goorn Gethsemane graad kloor makt, dat nu woll dat Enn kamen wüür. Un wat seggt Jesus dorto? He seggt: Vadder, dat is, as du dat meenst! Nich mien Wille, dien Wille schall dat ween!
Un denn to siene Frünnen: "Wi wüllt uns op'n Weg maken, he is al dor, de mi verraden warrt." — Ik weet blots, ik harr mi woll eerst maal versteken vör Angst. Villicht findt se mi ja goor nich, de Mörders!

Aver Jesus, de deit dat nich. He weet genau: Versteken, dat is nich, wenn Gott, sien Vadder, na em röppt. Un denn kaamt se, de Suldaaten, un vörnweg is Judas, de Anstand un Geweten wegsmeten hett un Jesus ganz leevtallig küssen deit! Nee, dat is ja widerlich, un Petrus haalt ok glieks sien Metz rut un snied't den vördersten Suldaat dat Ohr af. — De köönt wat beleven, de Suldaaten! Petrus is füünsch! Avers Jesus seggt:
"Nee, laat dat, ik will dat nich! Mien Vadder kann 100 Engels schicken un mi hier ruthalen, wenn he will. Dat is avers nich de Saak hüüt!"

Nich de Saak hüüt? Wie hefft doch nu Krieg in'e Ukraine. Do warrt noch veel mehr afsneden as blots een Ohr! Beens un Arms — un ok dat Leven mööt se hengeven, de armen Minschen — sogoor unschüllige Kinner mööt grulich starven.

Ik fraag mi, wat schall een nu doon? Bringt dat överhaupt wat, wenn Jesus an't Krüüz geiht för de Schuld von de heele Eer? Kann he uns retten von all de fiese Gemeenheit un den Hass? — Ja, Jesus hett uns würklich den Weg wiest, de uns in Heben bringen schall. Beter is dat, Unrecht to lieden as Unrecht to doon.

Hass kann keeneen nich retten — bloots Leev kann dat.
De Leev — de Leev is dat, de uns alleen retten kann.

Miene Ogen kiekt na Gott hen un sien Herrlichkeit — da is nix anners as Leev.