Dat Platt, wat man vun mi so hört,
dat heff ick vun mien Mudder lehrt.
Man schnackt bi so'ne Saak
tomeist vun Mudderspraak.
Grootmudder heff ick duppelt hat.
Vun de wör bloß de Hälfte platt.
Urgrootmuddern harr ick veerfach,
Ur-Ur-Grootmuddern harr ick acht
un de ehr Omas wörn sössteihn Stück.
Dordörch harr ick doch richtig Glück,
denn de hebbt al wat för mi daan.
Ohn de wör ick wol nich entstahn.
Mit noch mehr Generatschonen trüch
verleer ick bald de Öbersicht.
Doch toveel grübeln bloß deswegen
is nich so goot för mienen Brägen.

All de Vörfohrn, dat magst ahnen,
wörn woll nich alle bloß Germanen.
Hebbt sick nich kennt, vun mi nix ahnt,
de hebbt wiet ut'n anner wahnt.
Dat kann ick woll beduern.
Poor hebbt leevt inne Masuurn
un annere in Neddersassen
poor kunn woll na'n Utland passen
oder keumen ganz woanners her.
Wo nipp un nau, weet ick nich mehr.

All de Mudders verdank ick mien Leben.
Man wo veel Vadders mag dat geben?
Dat lett sick so akraat nich telln,
dat is nich mehr fasttostelln.

Mancheen hett dat nich mol wüsst,
dat he mehrmols Vadder is.
Dat Vadder warn kannst woll verschwiegen,
man nich so goot dat Kinnerkriegen.

"Papa", dat sä'n all veele Görn
to Kerls, de gor keen Papa wörn.
To veele ward jo Papa seggt,
de sünd in Wohrheit nich ganz echt.
Uck Mamas hebbt all mol nich wüsst,
wer de wohre Papa is.
Ick heff de Öbersicht nich mehr,
dat kummt mi as so'n Urwald vör,
dor kummt villicht mien Ursprung her.
Ick heff mit all de Kerls un Froon
doch ursprünglich wat to doon.
Dor finnst keen Anfang un keen End,
wenn man de Vörfohrn nich so kennt.
De hebbt villicht anstatt bloß platt
uck anner Mudderspraken hatt.
Een Spraak alleen, de reckt woll nie,
faken is dor'n Mundoort bi.
Een Mundoort is sick to begröten
un dorbi gifft man sick'n Söten.
Ick kenn sowat uck as Bussel,
ick bin jo uck keen lütten Dussel.
So as de Mundoort jüst mol is,
ward butscht un knuutscht un faken küsst,
wat faken ünnerscheedlich schmeckt.
Dat liggt denn mehr an Dialekt.

Inne Mudderspraak, dor stickt
veel mehr in, as se versprickt.
Mit Grotmudder- un Mudderspraaken
laat us man so wietermaken.
Dor künnt de Jungen un de Olen
sick doch fein mit ünnerholen.

Allgemeen vun Vadderspraak
ward nich ganz veel Upwand maakt,
wiel Vadder lang mol öberleggt,
bit he öberhaupt wat seggt.