Vun Diogenes kunnst wat lehrn!

vun Wolfhard Sauerbrey


Dor steiht dat nu, dat niege Jahr, vör di —
wat güng dat ole blots so gau vörbi!

Hest lang op tövt, un nu — vull Överraschen
denkst du an all de Vörsätz in dien Taschen.

Wat hest du nich allns vör! De List is lang,
se drückt op di, de veelen plaanten Saken.
Schaffst du dat allens würklich? Wees nich bang:
Diogenes weet Rat bi sockse Saken.
Wat sä he doch, de Ole in de Tünn,
to Alexander? "Gah mi ut de Sünn!"

Vörnahmen harrst du di in't ole Jahr,
an all vun diene "Frünnen" mal to schrieven.
Man kiek mal nipp un nau: denn warrt di klar,
de gröttste Deel, de kann di stahlen blieven!

Mit de so nöömten "Frünnen" gah mi af!
De stehlt di bannig veel vun diene Tied,
un is dat denn mit di eens Dags so wiet —
de weent un klaagt gewiß nich an dien Graff!
Segg rohig, as de Ole in de Tünn,
to so een Minschen: "Gah mi ut de Sünn!"

Nimm denn to'n Bispill mal dien Alldagssorgen:
dor steihst du vör dien vullet Kleederschapp!
Wat hangt dor'n Kraam! Langt för fief Minschen knapp,
un du fraagst bang: wat treck ik an vunmorgen?

Dat mehrste hest du woll dree Johr nich drägen,
is lang schon ut de Mood, is nich mehr heel,
is meist to lodderig för'n Olendeel —
af mit Verlust —— dat mehrste mienetwegen!
Un slepst du di denn dormit na de Tünn,
denn segg getrost dien "Gah mi ut de Sünn!"

Nu sittst du vör dien Volkshoochschool-Prospekt:
Mien leve Gott, wat dor doch binnen steckt!
Wullst du nich Ingelsch un dat Sniedern lehrn
un di vun nu af an vegaansch ernährn?

Computerkurs un Batik-Maleree,
de Angelschien, poor Stünn' Philosophie,
villicht is ok free Snacken mit dorbi,
un denn för "Fortgeschrittne" Weveree.
Pack dien Prospekt, un dormit na de Tünn —
un segg getrost dien "Gah mi ut de Sünn!"

Nu kiek mal sülven ehrlich in di rin,
denn wiest amenn düt Riemel ok sien Sinn:
Dat meiste is nich nödig un nich wichtig!
weg! över Bord! Dat annere maak richtig!
Un maak klor Schipp — dat Leven bruukt nich veel,
wegsmieten: dat is Balsam för de Seel!
Un denn stell di mal sülven op de Proov,
versööch di mal as kyn'schen Philosoph!
Un segg to allen Schietkram, Plunder, Plünn',
wat du jüst lehrt hest: "Gaht mi ut de Sünn!"



3.1.2016


na baven