Mien Leevsten un ik sünd ja "Boomers", also nich mehr ganz jung, un kiekt af un an geern nochmaal dat ole "lineare Feernsehn" — also nich Streaming un Netflix un so, sünnern dat, wat jüst löppt, un sogor de "Apentlich-rechtlichen". Mien Leevsten hett dor överdag mehr Tied to as ik, denn he warkt in't Home-Office un lett geern blangenbi dat Kiekschapp lopen.

Annerletzt weer he avers doch vergrellt: "Den helen Dag wiest se, woans de den norweegschen König to Graff bringt! Stünnenlang. Mien leevste Sendungen laat se utfalln. Bloots as se de Huushaltsdebatte in'n Bundsdag wiest hebbt, weer't slimmer — dat weer noch ööder!"

"Stimmt — nich mal vun Peer woor de Sarg trocken, bloots vun'n ordinäres Motorvehikel! Bi de Queen möök dat mehr her. Swatte Peer, un de Hööf ümwickelt."

"Och wat, so'n Gräffnis süht doch jümmer liek ut. Worüm eentlich? De Norwegers kunnen doch för ehrn König mal en echtes Wikinger-Gräffnis maken."

"Du meenst so'n Schippsbestattung?"

"Ja. Stell di doch mal vör, dor leeg dat Schipp, so'n echte höltern Drakenschipp, an't Över vun so'n dramatischen Fjord. Un de Sarg vun'n König warrt ropdragen —"

"Ik glööv nich, dat de Wikingers Särge bruukt hebbt!"

"Denn nich, is ja ok egaal, se kunnen em ja eenfach in de norweegsche Flagg wickeln. So, un denn leggt dat Schipp dor af un glidd so langsam den Fjord daal. Un denn —"

"Wosaken dat? Heel alleen? Ünner Seils? Un wenn de Wind oplannig steiht?"

"Dat warrt se ja woll hinkriegen hüüttodaags, un wenn't mit'n inbuuten Elektromotor mit Feernstüern is! Ja, un denn kümmt de Momang, wo en Schütt vun't Över ut mit'n Brandpiel dat Drakenboot in Brand schütt. Dat is en grote Ehr för em, un he hett dat al johrenlang traineert. Villicht sünd't ok twee, vun beid Sieden vun'n Fjord, dat ok ja nix mallöört. Un denn glidd dat brennen Schipp noch beten wat länger den Fjord hendaal, un de König verbrennt mit sien Schipp, un an de Steed, 'neem opletzt de Resten ünnergaht, dor is denn dat Königsgraff. Dat weer doch wat."

"Ja, dor wöörn wohraftig all Lü an't Kiekschapp kleven! Mit Drohnenopnahmen vun baven, dat warrt dull. Ik glööv, so'n groot Schipp in Füür wöör sik sogor bi Regen good maken — sachs noch dramaatscher. Dor wöörn ok orrig veel Touristen na Norwegen kamen, dat weer en gode Reklaam! Folklore bet toletzt. Ok wenn dat eentlich bloots unhistorische Kulturkitsch is."

"Un wenn dat denn so'n grote Hit is, warrt anner Länner natrecken un ok ehr Böversten op naschonale Wies to Graff bringen! Woans to'n Bispill?"

"Also för mi sülven wöör ik mi ja en Himmelsbestattung wünschen, so as se dat in Tibet hebbt, 'neem een schöön buten utleggt warrt, Gesicht na'n Heven, un de Deerten dröfft sik denn den Maag vullslaan. Ik mag düssen Gedanken. Worms un Mikroorganismen freet uns ja doch, woso nich Kreihn un Vossen? Avers för'n Kiekschappöverdragen orr en Internetstream is dat sachs en langwierige Saak — daag- orr wekenlang överdragen, bet bloots noch de Knaken över sünd, dor wöörst du opletzt ok wedder meckern."

"Hm, de Dalai Lama warrt sachs jichenswenn den Lepel afgeven, avers he warrt sik wiss nich överdragen laten. Un in de Kant weet ik sünst keen prominenten Minschen, den sien Gräffnis se överdragen wöörn."

"Ha, avers stell di vör, General Al-Sisi vun Ägypten wöör doodblieven! De Ägypters kunnen en ganz grote Show levern mit Inbalsameern, Mumifizeern, so mit witte Döker, denn en Guld-Sarkophag un em opletzt in en Pyramide steken."

"Dat warrt de Renner! Wenn dat överall överdragen warrt, will Donald Trump ok glieks en Pyramied — natüürlich de gröttste in de Welt..."

"Hm, för em kunn dat gahn, avers villicht is dat doch nix för Al-Sisi. Pyramidenbu duert lang, un as Muslim will he ja doch fix begraven warrn. Ik weet nich mal, wat dat Inbalsameern dor nich —"

"Jaja, dat hett fröher veel to lang duert, avers hüüt mutt so'n Pyramied doch fix hentokriegen ween. Se köönt dat ja al fertig hebben för den Fall, dat een vun de Bövelsten in't Gras bitt. Orr in'n Wööstensand. Un Platz för Pyramiden hebbt se ja noog in de Wööst."

"Richtig, un se kunnen poor Schätze mit em verbuddeln un de Graffrövers denn een na'n annern wegfangen."

"De Schätze sünd denn dat staatliche Sünnervermögen. Blifft dor jümmers op de hoge Kant."

"In Moskau hebbt se fröher ok ehr Grootkoppten inbalsameert. Lenin. In en Mausoleum opbahrt."

"Dat wöör Trump ok best gefalln. Inbalsameert un in de weltgröttst Pyramied — apentlich opbahrt. Un jümmers en lange Slang vun Bewunnerers vör'n Ingang."

"Avers typisch amerikaansch is dat nich! Hebbt de överhaupt wat Tyypsches?"

"Afknallt warrn."

"Stimmt. Dat wünscht sik Trump avers ehrder nich. Ha, avers wenn in Frankriek Macron to'n Starven kümmt — leider is he ja noch beten jung —" (wi weern meddewiel ganz schön afdreiht), "denn mööt se em op echt franzöösche Aart tovöör noch guillotinieren."

"Em mit Gewalt to Dood bringen?! Ok wenn he gor nix verbraken hett? Dat is streng nahmen keen Gräffnis. Wat is denn dat Gräffnisrituaal?"

"Dat sien afslaan Kopp op'n Pahl opproppt warrt."

"Dat warrt sik nich dörsetten, de Franzosen hollt op Prunk un Ehr för ehr Staatslü, un dat mit den Kopp weer ja rein dat Gegendeel. Dat weer ja meist so, as wenn en Staatschef in Middelamerika as Minschenopper ennen müss, na Aztekenaart — wenn't denn de Azteken weern —"

"Ja, orr wenn Narendra Modi vun Indien mal afnippelt — oolt noog is he ja — un se denn sien Witfru lebennig mit em verbrennen wöörn. He is doch so'n strammen Hindu! Denk di mal de Inschaltquoten! Beter as bi Football." (De politische Korrektheit harrn wi ok lang achter uns laten.)

"Avers dat weer unethisch, un uns apentlich-rechtliche Anstalten wöörn dat nienich överdragen — online wöörst dat avers wiss to sehn kriegen. Överhaupt, Hindus maakt dat hüüt ok nich mehr, un de Staaten warrt nich so hemmungslos achter de Quoten ranween, dat se ehr egen Gesetten breekt, un mit so'n Witfruun-Verbrennung kannst ok keen Reklaam nich för'n Tourismus maken. Dat wöör ik nich mal mehr Kulturkitsch nömen."

"Wat gifft't denn noch för spektakuläre Gräffnis-Rituale? Een weet ja doch to wenig af vun anner Völker un Kulturen..."

"Op jeden Fall kunn so'n Wikingergräffnis in all Länner en Trend to ethnisch besünnere Gräffnisaarten setten — en Ethno-Gräffnis. Welk Aart kunn denn för uns Noorddüütsche gellen?"

"Hm, also wenn du — so as bi dat Guillotinieren — dat Starven sülvst mit inbetreckst, wöör ik seggen, as lebennig Minschenopper in en niegen Diek begraven warrn is heel noorddüütsch. Du weetst doch, se hebbt angeevlich fröher ut Avergloven wat Lebennigs —"

Waah, dor liggt doch nich etwa Fiete Merz ünner?!

"Stimmt! Un mit den Klimawannel un de Meeresspegelverhööchten warrt de Diekbu ja doch heel wichtig. Avers denkst di dat denn bloots för Staatschefs un hoge Lü — orr för jedereen? Ik meen, Fiete Merz much ik nich ünner mien Diek verbuddelt weten — dor wöör ik mi nich seker achter föhlen. Un Steinmeyer eentlich ok nich."

"Hm. Nee, solk Typen köönt den Diek keen Stabilität nich geven. Dat kann na achtern losgahn. Un dorför is de Klimawannel ja nu doch to eernst — wi köönt uns nich in Gefohr bringen."

"Fiete Merz wöör sowat ok gor nich maken wulln. Un gegen sien Willn kannst en Böversten ja so en Ethno-Doodsaart plus Ethno-Gräffnis nich opdwingen."

"Laat man lever. So'n echt noorddüütsch Hünengraff op so'n lütten Knüll mit Feldsteens — dat is villicht doch dat Beste."

"Ja, dat hett wat. Un de Wikinger-Saak mit dat Drakenboot."

"Ja, un de Wikinger-Saak."

Kiek, so föhrt de Klimawannel ok ut hemmungslose Albernheit wedder trüch op de nüchternen Fakten.

Bild Drakenboot: Thomas Seemann