Iesbeen, Smöken un anners wat

vun Karl-H. Nissen


Letzt weer ik to'n Iesbeen-Eten vun mienen Verein. Ik kann juuch seggen, dat weer en Iesbeen! Lecker! Dat Fett bummel meist över den Töllerrand! Un denn allens, wat dor noch so to höört, Erbs-Püree un Speckstipp un Kööm un Beer! Allens allerbest.

Ganz to'n Anfang harr de Vörsitter ene lütte Reed hollen, harr "Goden Dag" seggt, un dit un dat, un denn sä he:
"Smöökt warrt hier nich in'n Saal! Wenn een vun juuch smöken will, denn mütt he rutgahn, up'n Hoff."
Nu hett mi Smöken nie nich stöört bi't Eten, — bet up eenmal. Dat weer bi't Gröönkohleten. Dor hett een an'n Naverdisch sien Piep ansteken mit schott'schen Tobak. Gräsig, ganz gräsig! Man; as ik an'n laten Avend mit all dat Iesbeen in'n Buuk na Huus güng — ganz vergnöögt —, dor heff ik bi mi dacht, mi gefallt dat, wenn ik kenen Qualm bi't Eten rüken mütt.

Een kann sik aver ok över anners wat argern bi't Eten. Ik kann mi besinnen, wi weern up Reisen, harrn slapen in en Hotel un seten morgens bi't Fröhstück. Wat geev dat allens för'n leckern Kraam! Anneke keem mit twee kaakte Eier an, een för mi, een för sik. Se kloppt ehr Ei baben up un puul de Schell af, ik versöch, de Spitz mit dat Metz aftohaun. Dat klappt nich jümmers. Man denn hebbt wi mit Appetit uns Ei eten. Dor füng an'n annern Disch en Fru an mit uns to snacken:
"Nee," meen se recht wat argerlich, "wo kann dat blots angahn, wo kann een blots Eier eten! Alleen dat Afpellen! Disse Puulkraam! — Un wo leeg is dat, wenn een denn de Duft vun't Ei in de Nääs stiggt. Un överhaupt, wo so'n Ei doch jümmers so unangenehm rüken deit. Wo kann een blots Eier eten!"

Wi beiden keken heel verbaast, man de gode Fru kunn gor keen End finnen. Se snackt luut, un all Lüüd rundüm harrn wat dorvun:
"Un wenn dat Ei denn glibberig is! — Iiiih!", füng se nu wedder an un vertell, vun to hart kaakt Eier, vun to week Eier, vun frische Eier un, un, un...

Dor harr Anneke enen goden Infall. Weest, wat se maakt hett? Se hett noch twee Eier haalt. Un de hebbt uns richtig goot smeckt.


Bild Iesbeen: Rainer Zenz/Wikimedia Commons
7.11.2010


na baven