Uns Maiboom

vun Günter Weber


Johren lang ümmer datsülbe vör den iersten Mai: Wo kümmt de Maiboom hen? Een Johr bi den Naver in den Vörtuun, anner Johr wedder bi en anneren. Jedes Mol en groot Lock buddeln. En hunnerter Plastikrohr innen Grund. Doar käm dann de groote hölterne Boom rinn.

Ik weer doch dat vör drei Joahr satt.

Ok wenn ik över veertig Joahr Beamten west bünn — wat ik bi Max Ewert in de lütte Smä lehrt heff, dat behüllste drin. Inne Smä vun Firma Siemes heff ik Duppel-T-Drägers op Länge snäden. Fein boven rundschweißt un mit Flachiesen verbunnen. Enen Meter tachentig lang wier dat Grey. Mit den achteihner Bohrer Löcker in maakt un bi de Nabersfru in den Vörgaarn mit Beton insett. De ole hölterne Boom käm doch nich tau Geltung! Ik heff vun den Bauhoff vun de Stadt Kevelaer enen olen Laternenpost krägen. Richtig schwor. Aver verzinkt. Möst in mien Leven nix miehr an daun! Boven op heff ik den Iehsenpohl taumokt. Ene 1o-Milimeter-Mudder dropschweißt, dormit de Kranz fastschruwt warrn künn. Den Iesenkranz hebben wi all Johren lang hatt.

Üm dat hochtauböhren, wieren all Hannen nödig. Unsern enen Naber is enen Buurensohn, nu Amtsrat op dat Gericht in Moers. So’n bäten Buur is hei ümmer noch. Lütten Trecker mit Frontlader un ok anner Geschirr hett hei allens noch. Worüm schuven wi den Maiböm nich mit den Frontlader na boven? — Dat wier aver en gauden Infall!

So gau kannst nich kieken, as de Maiboom stünn. Norbert un Jutta sünd de Naberslüü direkt neven den Maiboom. Mit groot Terrass, Grill inbuugt, allens vörhannen, üm sone grote Koppel mit Fleesch, Fusel, Bier un Wien tau versorgen. Mi un ok mien „Exverloovte“ wier dat so üm Klock neegen tau koolt. Wi sünd ok de öllsten Lüü in de Naverschaft. — An'n iersten Mai hörte ik, de „Harten“ sünd ganz „fröh“ en beten stöckerig na Huus gohn. Doch dat nächste steiht all an: Naversfruu Brigitte warrt an'n tweiten Juno söbentig Joahr. Wat denken mien leev Fründen, wo wi hengahn, wenn de Maiboom 2017 Geschichte is? — Ja, genau so.


Fotos: Günter Weber
14.5.2017


na baven