Oosterhosen vun Silke Frakstein Mümmelmann, seggt man ok. Wi hebbt jümmers Mucki seggt, so as Henry Vahl in dat Stück "Tratsch im Treppenhaus". Dat gifft Hosen un Kaninken. De Hosen ward jümmers weniger, seggt de Fachlüüd. Keen veel in de Natur ünnerwegens is, bruukt keen Spezialisten, de süht dat. Ober de mehrsten interesseert dat nich. Un dat, wat dor so rümpeest, dat sünd Kaninken un de ward jümmers mehr. De Beester freet allens af, wat to kriegen is, un hebbt jo nich mol vör'n Karkhoff Respekt. Jemehr Tohuus liggt ünner de Eer, mit'n deepen Ingang, un is ideal to'n Haxen-Verknacksen. Un so männicheen Wuffi kann'n Leed singen vun düsse Behausung.
De Hosen leevt ganz anners. Platt op Feld sitt he un mookt sik ok ganz platt, töövt bit toletzt, suust denn af, krüüz un quer un schafft dat eegentlich jümmers. Wiel ober mehr un mehr Mais plant warrt, hett so'n Hoos keen Platz mehr. Bi
de Muckis is dat anners. Dat gifft welk, de hebbt 'n Stall, warrt
heegt un pleegt, loopt sogor in de Wohnstuuv rüm, bit de Natur
seggt: Adschüs. De annern Kaninken hebbt, as seggt, dat
Tohuus ünner de Eer, mookt veele, veele lütte Kaninken un
kümmt trecht. Un denn, denn gifft dat noch de, de man eeten kann un dröff.
As Kinner harrn wi de letzte Sorte. Wenn se lütt weern, hebbt
wi mit jem speelt, un uns Plicht weer, Foder to sammeln. To Wiehnacht
un bi Konfirmation geev dat Kaninken mit Rotkohl, Klößen
un ganz wunnerbore Schü. Un nu, so veele, veele Johren loter, froog ik mi: Wie warrt denn nu so'n Mucki slacht un terleggt? Op wat mutt ik Acht geben? Fang ik bi den Kopp orrer bi de langen Lauscher an? Mann in de Tünn, is dat allens swoor! Mien Fründin weet dat ok nich. Weetst wat: Ik snied dat eenfach in de Mitt dörch. Dennso heff
ik de Nougatfüllung gerecht verdeelt. 16.4.2019
|