De veer Frünnen sünd echte Asse

Sieker Triathlon

vun Heinz Tiekötter

Se speelten nu all fiev Stünnen Skoot. Ossi, de Wirt, keek all stännig op de Klock. In fiev Stünn kannst du 'n Barg drinken. Jochen smeet siene Skootkorden op'n Disch un öbernehm de leste Runn. He müss sik op'n Padd moken, solang he noch gohn kunn. Dorüm smeten ok de annern de Korden op 'n Disch. Se wulln grod opstohn, as de Döör opgüng un Klaas rin keem.

He keem vun de Spätschicht, harr noch Licht sehn un wull noch gau 'n lütten Afsacker nehmen. He bestell glieks 'n Runn. "För mi nich mehr", wink Jochen af, "ik heff noog! Segg mol, Klaas", freug he, "hest du dien Fohrrad dorbi?" Klaas nickköppt un froog Jochen, wat he dat mitnehmen wull. He sall em dat man vör de Garoosch stellen. "Geiht kloor!" Jochen betohl un schaukel mit'n ondulierten Gang no buten. He harr'n bannigen Kleister.

Teihn Minuten loter stunn Jochen wedder in de Döör; man in wat för'n Tostand ok! He weer klöternatt un öber un öber mit Aantengrütt bedeckt. Woter leep em ünnen ut de Büx un he rüük as'n Swienskoben. All lachen se dörchenanner un repen: "Mann, Jochen, wat hest du denn mookt?" Jochen vertell, dat he de Kurve an'n Dörpsdiek nich schafft harr. He weer liekut in dat Woter suust, ünnerdükert un harr sik denn bit an'n Hals in de Aantengrütt wedderfunnen. Slagordig is he nüchtern worrn. He müss sik an de Böschung ruttrecken. Trüchkomen weer he bloots wegen Klaas. He müss em doch vertellen, dat he an neegsten Dag keen Fohrrad harr. Dat leeg jo noch in't Woter. Mit veel Juchei hebbt se Jochen all tosomen no Huus bröcht.

Koppheister gahn...

As Jochen siene Else an neegsten Morgen opwookt is, full ehr 'n afordigen Ruuch op, den se sik nich verkloren kunn. As se unruhig de Trepp doolgüng, is dat jümmers slimmer worrn. Dat hett ehr Bang mookt, bit se de Klamotten funn. De legen ünnen op de Deel in een lütt Rinnsool.

Wat se Jochen achteran an'n Kopp smeten hett, weet he ganz alleen. He snackt dor nich öber. He hett man bloots 'n Tiet lang "alkoholfree" drunken. Doch dat hett sik intwüschen geben. He is nu wedder normool.

Klaas hett sien Fohrrad twee Doog loter trüch kregen. Uns Füerwehr hett 'n freewillige Öbung mookt un em dat Rad mit de Dodenangel ruthoolt. Dorför geev dat 'ne Spenn vun Jochen. De is in'n Kroog mit Köm un Beer inwesselt worrn.

Un siet düssen Dag harrn wi bi uns in Siek en ganz nee Sportdiziplin: Wi harr'n nu dat Sieker Triathlon: "Supen, Radfohrn un Swemmen!"