Dat Krüz mit dei Krüzung

vun Hildegard Tölke

In ein'n Dörp dichte bi Lingen, dor giff dat eine geföhrlicke Krüzung. Veier Straoten droopt dor genau rechtwinklick tauhoope: eine van Norden, eine van Süden, eine van Osten un eine van Westen. Un dann staoht dor uck noch veier Wiespaohls. För Autofohrer is dat hier org geföhrlick. Un faoken naug, mangers sogor seläwedaogs, häff et do uck all knallt un leipe Malörs gäwen.

Nu weit jeder in 'n Straotenverkehr, wo hei sick bi Rechts vör Links verholl'n mott.

Eines Daoges passeiert et. Veier Autos kaomt tau glieker Tied uppe Krüzung an un bremst aff. Do fang dei Pangelei an. Nu wedd dat uck noch knibbelig. Dei Opelfohrer, dei van Norden kummp, draiht siene Schiewen rünner un röpp tau dei Autofohrerin, wecker links vanne Ostsiete näben üm in ehrn Audi hollt, tau: "Du moss teuwen. Ick kaom vör di. Kaom jao van rechts." Sei töff uck.
Jüss will dei Opelfohrer anfäuhern. Do röpp ut den Waogen rechts van den Opelfohrer ein'n öllerern Kerl, dei vanne Westsiete uppe Krüzung mit sien Mercedes hollt: "Nu gaiht 't tau wiet. Ick häbb Vorfahrt. Dat weit ick wisse. Staoh jao rechts van di." Dei Opelfohrer sütt dat in un giff nao.

Dei Mercedesfohrer is heller vörsichtig, kick nao links un rechts un wedder nao links. Un nu kann hei losfäuhern un denkt bi sick: Ick häbb wunnen Spill. Ick kann! — Flaitkepiepen!

Do huupt dat all luut un wild van rechts. Rechts van den Mercedesfohrer staiht jao noch ein Toyota. Dei Kerl draiht dei Schwiewen rünner un larmt: "Oogenblick maol! So gaiht dat hier aower nich. Du bis woll brägenkläöterig. Kiene Wildwestmanieren. Ick kaom vör di." Do maokt dei Audifohrerin de Dörn wiet aopen un schneert taun Toyotafohrer ganz schnippsk räöwer: "Du kanns nich fäuhern. Ich staoh rechts van di." Dei Toyotafohrer knallt dei Autodörn tau un bliff still sitten. Hei is in Brass. Wat nu woll kummp? Do sägg dei Opelfohrer tau den Mercedesfohrer: "Mensch, nu fäuher doch. Ick häbb dat vandaoge drocke!" "Kann ick doch nich," kummp dat trügge. "Rechts van mi staiht dat Toyota Auto." Un dat sülwige sägg uck dei Toyotafohrer. Jederein bestaiht stiewnackig up sien Recht.

Nao taihn Minuten stigg dei Audifohrerin ut. Sei will den Buck nu bi dei Hörns packen. So gaiht dann nich wieter. Sei verdeilt an dei ännern einen Zädel. Dor staiht uppe:

Wenn jederein up sien Kopp un up sien Recht bestaiht,
kaomt wi seläwe nich wieter. Wi aale häbbt doch noch
masse tau riegen in use korte Läwen!

Nu raoe eis, wecker taueierste woll fäuhern draff?