De Wiehnachtswunsch

vun Hannes Frahm

Lene un ik, wi sünd je nu al över tachentig Johr oolt un hebbt en wunnerbor Leven tosamen achter uns. Aver Wiehnachten, dat is jümmers so'n Saak, dor kann de Huussegen doch bannig scheef hangen.

Nich, dat wi uns in de Plünnen kriegt, ne! Dat geiht aver jümmers üm de Geschenken, de wi uns to Hilligavend schenken wüllt. Tja, wi hebbt doch meist al allens. Wat kann een den annern den noch schenken? Wi sünd övereen kamen, dat wi uns blots noch sowat schenken doot, wat uns goot deit, wat üns hölpen kann un wat wi ok noch för wichtig holen doot.

Vör fief Johr wull mien Fru doch partu so'n "BlueRay-Player", aver mit en Feernbedenen. Ja, denn hett se senn ok kregen. Tofreden weer se mit dat Ding nich ganz. De Feernbedenen harr ja en Knoop, wo een de Schuuflaad för de"BlueRay" jümmers mit op un to maken kunn, aver to'n Wesseln vun de Schiev mutt een doch ut dat kommodige Sitten op'n Sofa rutkamen. Un jüst dat, dat hett ehr nich so toseggt.

De Roboters summt un surrt sik dör den Huusholl...

Tja, middewiel hebbt wi to Wiehnachten in de letzten Johren en Roboter to'n Stuffsugen un en to'n Rasenmeihen kregen. Vör twee Johr hebbt wi för unsen Goorn en Anlaag to'n Watergeven för de Blomen un de Büsch kregen.

Un letzt Johr, dor harrn wi uns al in de Kladden!
Un wörüm? Wi hebbt en Waschmaschien, en Maschien to'n Drögen vun uns Kledaasch, beid mit WiFi, un en Spinn, woneem wi uns Plünnen buten drögen köönt. Modder wull nu partu en Maschien hebben, de toeerst de Plünnen sorteren un in de Waschmaschien rinstoppen kann. Wenn de Waschmaschien fardig is, schall de Maschien de Plünnen ut de Waschmaschien rut un in de Maschien to'n Drögen rinpacken, un dat mit WiFi! Wenn de Sünn schient, denn schull de Plünnensorteermaschien de Plünnen to'n Drögen buten op de Spinn hangen, un dat mit WiFi!

Is dat villicht de richtige Maschien?

Man, wat harr ik allens to doon. Bün vun A na B fohrt, heff söcht, heff söcht, aver nix funnen. Denn rin in't Internett. Ok dor heff ik söcht. Und? Nix! Na den Maan köönt de Minschen flegen un na de ISS, aver en Maschien to'n Sorteren vun Plünnen köönt de nich fardig kriegen.

So is dat nu kamen, dat wi letzt Johr Hilligavend keen Geschenk för uns harrn. Een Deel harrn wi aver: Uns Huussegen hung scheef!

So, un in bummelig teihn Daag is nu wedder Hilligavend. De dore Maschien hebbt wi jümmers noch ni. Nu hett sik mien Fru en Maschien för uns Goorn wünscht, mit WiFi, versteiht sik!

Nu wünscht se sik en Söök- un Utklei-Maschien för Unkruut. Wi wüllt in uns Öller nu nich mehr op de Eer rümkrupen, wi sünd doch al bannig oolt.

Ik sitt nu al siet twee Maanden vör de Mattschiev un söök in't Internett. Mi is nu al bannig flau in de Knaken un Hitten stiggt in mi op. WiFi, hölp mi!