Dei Wudu-Preister von Haiti

vun Behrend Böckmann

Kein Moritat — ein wohr Begäven!
Bi uns kannst dat noch nich beläwen,
man in karibisch südlich Zonen,
'neem Wudu*-glöwig Minschen wohnen.

Inne Sünnenstadt von't Inselland
an't Äuwer von't Haiti-Land,
wo dusende in Älend läben,
hett sik vör korten dit begäben:
'n Schubberjack in't Hieschenviddel**
söcht för't kranke Kind 'n Middel
un fråcht bi'n Wudu-Preister an,
wat man in den Fall måken kann.

Dei Schubberjack, so deit 'n weiten,
sall dor Monel Felix heiten,
dei as "Mikano-Baas" regiert
un dat Viddel kontrolliert,
hei hett hier vör Urt dat Seggen,
däd all männig Minsch ümleggen,
wenn sien Wudu-Gott em secht,
dat 'n Muurd is gor nich schlecht.

Wudu — dei Gott wür importiert,
as Globen nu vermengeliert,
as Globen denn tau Globen keem,
dei Wudu nie Gestalt annähm.
Denn vör gaut vierhunnert Johr
wiern Sklaven dor 'n gaude Wor,
Sklaven ut't fierne Afrika
inne niege Welt Amerika,
wo dei karibisch Inselwelt
as Hannelsplatz för Sklaven gellt,
in Hispaniola***-Inselland,
dat as bargich Land bekannt,
un vier Milljonen leet man dor,
tau slawen för dat Zuckerrohr.

Väle wiern von den Stamm Fon****,
sei danzten tau den Trummelton
för Wudu in ehr ollet Riek,
dei Gott un Späukel wier taugliek.
Un so hett dat denn ok klungen,
as Rose Laurens von'n Wudu sungen,
von'n Wudu-Gott in Afrika,
den sei wier bi Nacht ganz nåh,
un dat sei för em danzen deit,
bet von'n Lief dreef düchtig Schweit
un dei Wudu geef dei Kraft,
wat 'n Minsch allein nich schafft.

Doch dei Wudu hett sik wannelt,
wenn sik dat üm Haiti hannelt:
hüt röppt man den Wudu an,
wat hei wull dortau seggen kann,
wenn Stormwind inne Palmen quietscht
un Wåder up Plantåschen pietscht,
wenn dei Landmann deit all åhnen,
dat hei mit Kaffe un Banånen,
mit Zuckerrohr un gauden Rum
nich füllen kann sien Wirtschaftskumm*****,
ok in anner Fäll von't Läben
möt dei Wudu Ratschlääch gäben.

Vonne Schuberjack man weit,
wat sien kranket Kind angeiht,
dat dei Priester däd verkünnen,
man süll dei ollen Hexer finnen,
dei verhext den Baas sien Kind
un ut dat Hieschenviddel sünd,
denn't kranke Kind von Schubberjack
wür verhext von't olle Pack.

Dit harr Wudu den Preister secht
un Schuberjack nimmt sik dat Recht,
deit mit Metzen un Macheten
"hundertvierundachtzig töten".

Soväl Minschen måkt hei dod,
bringt as Verbräker grote Not,
doch dei Murder is sik wiss,
dat sien Kind verhext wull is,
dat't Sakrifisümäng****** möt gäben,
dormit dat Kind künn œwerläben.
So is't in Wudu sienen Nåmen
tau den Massenmurd denn kåmen,
wo 'n Schubberjack regiert dat Land
in't Hieschenviddel an'n Sünnenstrand.

* Wudu, Wodu, Voodoo, Vodun ist eine traditionelle westafrikanische Religion, die durch denn Sklavenhandel heute noch in der Karibik praktiziert wird, weltweit ca. 60 Millionen Anhänger hat und in Haiti und im westafrikanischen Benin offizielle Religion ist.
** Hieschenviddel, plattdeutsch für Slum
*** Hispaniola, Insel in der Karibik, auf der die Staaten Haiti und Dominikanische Republik liegen
**** Fon, Volksgruppe in Westafrika
***** Kumm, plattdeutsch für tiefe Schüssel, henkelloses Gefäß, auch Trog
****** Sakrifisesümäng, frz. sacrifices humains — Menschenopfer