Psalm 118

Dankt den HErrn, denn he is Leevde,
un sien Hochsinn duert for all Tieden.
Israel schall mellen: Siene Huld wohrt ewig.
Et segg nu dat Huus Aaron: Siene Gnaad blifft for all Tieden.
Et seggt nu, de den HErrn förcht:
Sien Barmen wohrt bit an't Enne.

In mien Drangsal reep ik den HErrn an,
un de HErr is met mi,
dorüm bün ik vull Totruun un Gloven;
wat köönt Minschen mi anhebben?
De HErr is met mi, mi bitostahn;
un ik will up miene Broers in'n Wedderpart daalkieken.

Goot is, up Gott den HErrn sik verlaten,
un nich dat Vertruun up Minschen setten.
Et is seker, sik bi den HErrn to bargen,
un sik nie nich up de Herrschop verlaten.
All um mi to, de vun Gott den HErrn nix nich wat afweet,
in'n Naam'n vun den HErrn will ik jem daaldwingen.
Alle sünd rund um mi to överall; aver
ik gah tegen jem an, in'n Naam vun den HErrn
will ik jem afwehrn.
Se summt um mi to as Immen; aver
se verglimmt at een Füer in'n Stickelbusch;
in'n Naam vun den HErrn wehr ik jem af.
Se stööt mi, at ik to Fall kamen schall; aver
de HErr steiht mi bi.

De HErr hett dat Heten un Anwiesen, de HErr
is mien Psalm un is mi to'n Hölper worrn.
Dor is Frohlocken, Juchen un Trumpf
in de Telten vun de Oprechten:
'De Rechte vun'n HErrn beholt ehr Regentschop.
De Rechte vun'n HErrn is tohööcht;
de Rechte vun'n HErrn steiht in Macht!'

Ik warr nich verdarven, veelmehr leven
un den HErrn sien Doon künnig maken.
De HErr hett mi swoor in Tucht nahmen,
doch hett he mi nich in den Dodesslaap övergeven.

Maakt mi open de Doren to dat Recht,
dat ik dor ringah, üm den HErrn to danken.
Dit is de Tempeldoor vun'n HErrn,
blots de Gerechten warrn dor harin gahn.
Ik dank di, dat du mi anhört hest;
Een Levensretter büst du mi worrn.

Den Steen, den de Bolüüde afkant smeten,
Is to'n hilligen Steen, to'n Smucksteen worrn.
Dat is vun'n HErrn oordeelt un is
een Wunnerwark vor us Oogen.
Dit is de Dag, den Gott de HErr maakt hett;
laat us jubeln un us an em froh sien.

O HErr, ach breng doch Hölp!
O HErr, geev doch Segen!
Priest wees, de dor kümmt in'n Naam vun'n HErrn sien Huus!
De HErr is Gott, de us sien Lecht gifft.
Maakt dat Fest smuck met Maigröön
bit babenhen an den Altor!
Du büst mien Gott, di will ik danken;
mien Gott, di will ik priesen.
Dankt den HErrn; vull Barmen
is he un sien Gööd is for alle Tieden.

Amen.