Dat kannst mi glööven!
Glücksbringer in'n Olldag

vun Roswitha Osterbrink

To'n Anhören hier klicken:
Lesen deit Roswitha Osterbrink.

In eine Geschichte find ein lüttke Nachtwächter bi siene Arbeit in Maondschien ein "Glückscent". Hei freit sick heller. Hei weit, dat nu dat Glück kummp. Hei is so bliede, dat hei mit sien Hörn dat ganze Dörp tausaome roopen deit. Sei kaomet aale anloopen. Dei Poet, dat Marktwiev, dei Schmidt, dat Blaumenwicht un uck ein lüttken Slüngel is dorbi.

"Bi mi kummp van Nacht dat Glück!", vertellt hei un grient äöver't ganze Gesicht. Dei Lüe freit sick mit üm. Sei settet sick bi üm daol un teuvet tausaome up dat Glück. Alls is stille. Man kann den Wind inne Bööme taulustern. In Buschk sing eine Nachtigall un aff un an flattert ein Fleermuus vörbi. Aober anners kann man nix hörn off seihn.

Dei Nacht wedd ruhiger un immer schwatter. Man van't Glück is noch nicks tau seihn. "Wenner kummp denn nu dat Glück?", frög die lüttke Slüngel. "Wo lange mööt wi denn noch teuben?"

Dei Poet, dat Marktwiev, dei Nachtwächter un dat Blaumenwicht hebbet dat all lange begräpen. Sei wätet, dat Glück is all dor, weil sei aohne tau strien bi'nanner sitten un lustern käönt.
"Wor dei Mensken bi'nänner sittet, mit'anner schnacket, up den annern hört un verseuket den annern tau verstaohn, dor is dat Glück", verklort sei den lüttken Slüngel.

Bi miene Arbeit in dei Ollenpleeg kann man dat uck dütlick marken. Wenn wi Schwestern us mit ein Koppel van dei ollen Lüe tausaome settet, dann dürt dat nich ganz lange, un sei fangt an tau vertellen. Dann wedd över dei Kinner un Enkelkinner un uck över dei Aorbeit van domaols schnacket. Jederein weit wat. Sei freit sick. Sei sünd bliede, dat dor eine is, die sück Tied nimmp un taulustern deit. Sei könnt ehre Fraide, aober uck ehre Sorgen mit annersein deilen.

Man dat mott ja nich fortsen immer ein grooten Koppel Lüe wän. Aff un an is dat uck all dei lüttke Schnack mit Naohber övern Tuun. Viellicht uck mit ein Frömden bi 'n Husdoktor off anne Kasse in Supermarkt.
Jao, mit 'n bäten Tied un ein kottet Gespräch kannst aff un tau för annere "Glücksbringer in 'n Olldag" wän.

Bi us up plattpartu.de finnt man nu utsöchte Bidräge van disse Radiosendung.