Passion 2015:
Sünndag Reminiscere

vun Rudi Witzke


För Francis Meyer weer 2012 een besünner Fastentiet. Se hett för dat Johr dat Hungerdauk maalt. Wi vun Plattpartu hebbt vun Misereror de Verlööf kregen, den Bidraag to nütten. Söss Sündage hett dat Fasten. Ut söss Deile besteiht dat Hungerdauk. De Grundschoolliehrerin hett sik länger as en halfes Johr mit dat Thema befaat. Se hett jümmer wedder Bibelstellen leest, se hett Skizzen över Skizzen maakt, Ideen to Siet packt. Se hett sik niege Gedanken maakt un is denn modig worrn un an't Wark gahn. Na rund 8o Stunden weer dat gröte Bild för dat Hungerdauk trecht.

Se hett de Gemeind dat Bild wiest. Die Schwestern un Bräuder in Gloven kunnen sik nich losrieten vun dat Beseihn, Inseihn, Düden, Utdüden. Verstahn. Se kemen nich loos. Dat weer för Fruu Meyer de gröttst Lohn. Wat dat Hungerdauk ok Thema för Gespreeke weer, wöör se fragt. Aver wiss doch. Dat Wichtigste: Mit dat Krüüz is nich dat Enn. Mit dat Krüüz is en anner Oort vun Leven in de Welt kamen. Dor kemen ok hier un dor maal Twievel up. In de Gemeinschop vun Glövende fünnen aver vele den rechten Weg un de Twievel verflögen.

Fru Meyer hööpt dorup, dat de Biller för veele Minschen en Stupps sünd, sik later denn ok noch mit de Geschichten ut de Bibel to befaten.

Keen Gedanken mucht Fruu Meyer daran verswennen, dat de Biller annerwegens namaakt warden köönt. Se mucht dat giern, dat ehr Bild en Unikat bleev. Un dor heff ik een anner Meinung. Wenn de Grundschaulliehrerin mit ehr Schöler lang naug tosamen över de Biller tosamen snackt hett, kunn se den negsten Vörmeddag minnst twei Stunnen de Kinner dat namalen laten, wat se jümmer noch binnen in ehr Billerwelt vun dat Hungerdauk hebbt.

Wi schallen afgeven können, Biller, Kläng, Harmonien.

Ik heff hier al maal vun dat Belevnis in dat Goorngraff in Jerusalem vör dat Damaskusdoor vertellt. Ee französche Kinnergorn Optreckerin keem mit een lütt Grupp in de Meditatschoonseck un wieste de lütten Jungs un Deerns Biller vun de Passioonsweek. De Kinner kunnen ehren Iever kuum trüüchhollen. Se wullen ok vun de letzten Daag vun unsen Herrn wat vertellen. Un sülven heff ik dat mit öller Schöler belevt, dat na dat innig Bekieken vun Engelsbillern de jungen Lüüd wunnderbore "Kopien" ut ehr Erinnert maalt un teikent hebbt. Nu weern de Biller noch deiper bi jüm ankamen.


Wi, de Redakschoon vun Plattpartu, Marlou Lessing un Rudi Witzke,
dankt för de Verlööf MVG Aachen, dat Bild vun dat Hungerdauk hier to nütten.
Wi dankt de Liehrerin Fru Meyer.
1.3.2015

 


na baven