Beden üm Gaven för en junge Fru

Platt vun Marlou Lessing


Düt is en besünner Reisesegen, en Segen för de Levensreis för en junge Fru. Dat stammt ut de Carmina Gadelica, en Sammeln vun gälisch-spraken Beden ut Schottland, gegen Enn vun't 19. Johrhunnert sammelt un rutgeven vun Alexander Carmichael. Claudia Süßenbach hett den Text (Carmina Gadelica, Hymns and Incantations, ed. by C.J. Moore, Edinburgh 1992) in't Hoochdüütsche bröcht för de jungen Fruuns, de nu na dat Abitur in't Leven starten doot. Ik heff dat ut ehr hoochdüütsche Faten in Platt bröcht.

Ik baad dien Hannen
in en Regen vun Wien,
in Himbeersaft,
in Honnigmelk
un de negen besten Gaven
legg ik in dien leev Gesicht:
de Gaav vun de Gestalt,
de Gaav vun de Stimm,
de Gaav vun't Glück,
de Gaav vun de Goodheit,
de Gaav vun de Wiesheit,
de Gaav vun'e Barmhartigkeit,
de Gaav, mit Weel en Deern to ween,
de Gaav vun heel un deel beseelte Schöönheit,
de Gaav vun goodhartige Reed.

Düüster mag dat ween dor buten,
düüster mennig Harten dor,
man du büst as en junge Swaan mang ehr.
Dien Knööv is stärker as ehr Harten un Tungen,
nienich warrt en Woort vun dor di wehdoon.

Du büst en schaddige Steed in de Hitten,
en schulige Kaat in de Küll,
dat Oog büst du för den Blinnen,
en Staff för den Pilger,
en Eiland op See,
en faste Toorm an Land,
en Born in de Wööst,
Verlichtern un Heilen för de Kranken.

De Knööv un Kraasch vun de Deerns is dien,
de Kraft un Leevtalligkeit vun de Fruuns is dien,
de Leder un Vertelln vun de Olen.

De Gaav vun den Himmel sien Leev wees dien,
de Gaav vun de Steerns ehr Leev wees dien,
de Gaav vun den Maan sien Leev wees dien,
de Gaav vun de Sünn ehr Leev wees dien.

Du büst de Freid in all Weel,
du büst dat Licht vun'n Sünnenstrahl,
du büst de apen Döör vun'e Gastfründschap,
du büst de Leitsteern, op den Verlaat is,
du büst de Stapp vun'n Hirschbuck op'n Knüll,
du büst de Stapp vun't Peerd op de Wisch,
du büst de Anmoot vun'n swemmen Swaan,
du büst de Schöönheit vun all gode Wünsch.

Christus sien schöne Gestalt
is in dien rein, schier Gesicht,
de schöönst Gestalt,
de op Eerden weer.

De beste Stünn vun'n Dag wees dien,
de beste Dag in de Week wees dien,
de beste Week in't Johr wees dien,
dat beste Johr in't Riek vun Gotts Söhn wees dien.

All Hillige un Engel sünd kamen,
un Jesus Christus, de Fründliche, is kamen,
un de Geist, de wohraftig den Weg wiesen deit, is kamen,
un de König vun all Könige hett dat Leit nahmen,
di good to ween un di ehr Leevde to schenken,
di good to ween un di ehr Leevde to schenken.


Foto Lichtpieler: Bertram Botsch
Fotos Roos Cinderella: Antje Heßler
21.6.2020


na baven