Dat kannst mi glööven!
Dat kann ick nich koopen

vun Daniela Rippe


To'n Anhören hier klicken:


Lesen deit Daniela Rippe.


Aff un tau rüm ick gern eis maol miene Knippen ut. Wat sick dor mangers aale so in finnen dait! Vör allen masse Papier. Olle Kinokortens, Kassenbons, väle lüttke Zeddels — un wat häbb ick hier noch? N 'n ollen Inkoopzeddel, dor häbb ick allerhand upschräben, wat man so för dat Läben un dei Daoge äöwer bruuket. Eier, Melk, Brot, Appels, Bottern, Koffie, Zucker, Mähl, Marmelaode.

Ick weit noch, dat ick wisse nich blots disse Saoken inköfft häbb. Irgendwat fallt ein'n jao tauleßte dann doch jümmers in den Korf. Hier noch 'n bäten Seutet, dor noch 'n poor Käukskes för 'n Naomiddagskoffie. Aower dat is jao nich blots dei Melk, dei Bottern, dat Brot, oder dei Appels, dei man so daogs äöwer bruuket. Wisse, dat, man wat in 'n Buuk häw, dorför is dat nödig.

Ick kiek noch maol up den verschänen Inkoppzeddel — dei wichtigsten Dinge, dei wi för 't Läben bruuket, staoht dor nich up. Gaude Gespräche mit miene Kollegen un Frönde, dei fählt dorup; un Tied för mi un miene Familje häbb ick dor uck nich upschräben, un dat aalernödigste uck nich: Leiwe. Aohne Leiwe kann kienein'n läben, aower dat aals, wat dor up 'n Zeddel nich upstaiht, kann man sick nich koopen. Dat giff dat in 'n kienen Hökerlaoden.


"Twei Pund Tauwendung, ein Stünn vun Ehr Tiet un ein halve Tüüt Borgenheit, bitte!"
Foto DALIBRI/Wikimedia Commons

Dat, wat man in 'n Läben würklick bruuken dait, dat kann man mit Geld nich betaohlen. Wisse ick bruuk wat up 'n Dischk tau 'n Äten. Man dor is meistied doch uck so väl, wat ick eigentlick so nödig nich bruuke. Dei neie Handtaschken van den bekannten Designer off dei neie besünnere Bücksen ut den düren Plünnenlaoden. Et lohnt sick, sick maol dorop tau besinnen, wat würklick nödig is. Nich dat düre Tüg, dei besünnere Handtaschken, uck nich dat groote, neie Auto bruuk ick tau 'n Läben. Dat maokt dat Läben nich riek.

Dat, wat man in 'n Läben würklick bruuken dait, kann man sick nich koopen. Dor helpet uck kien Inkoopzeddel, dat krieget wi faoken naug einfach so. 'n gauet Gespräch mit Kollegen, ein Gesicht, wat mi fröndlick intaumeute kick, Lüe, dei sick frait, wenn wi inkaomt, dat maoket riek!


Översicht över de Reeg
"Dat kannst mi glööven!" is eine plattdütschke Andachtriege in't Radio (NDR),
dei siet den 1. Advent 1953 staodig in't Programm staiht.
Tau Tied schriewet hierför rund 75 evangelschke un katholschke Theologen
staodig Andachten up unnerscheidlicket Nedderdütschet un
Oostfäölschket Platt. Sendet werd maondaogs bit freidaogs
üm 14.20 Uhr van NDR 1 Neddersassen.

Bi us up plattpartu.de finnt man nu utsöchte Bidräge van disse Radiosendung.


14.5.2017


na baven