Dat kannst mi glööven!
Tied förnanner hebben

vun Daniela Rippe

To'n Anhören hier klicken:

Lesen deit Daniela Rippe.

Leßte Wäken häbb ick mi heller äöwer miene Oma argert. Aff un tau will sei mi uck einfach nich verstaohn. Ick bün dann mit'n dullen Kopp nao Huus henfeuhert, un gi aohnt, wat nu kummp: Ick häbb mi tauhuuse denn äöwer mi sülwes argert. Miene Oma werd in dissen Harwst 90 Johr old. Mit Huus un Gorn, Pötte un Pannen werd sei noch allennig fardig. Sei bruuket dor noch kiene Hülpe för. Un wat mi besünners frait, sei is uck noch heller fix un klor in'n Koppe. Wisse, mangers vergätt sei woll dat eine off annere, man dat hollt sick noch wat.

Foto: Gaijin Biker(Big Ben)/Wikimedia Commons

Oma was jümmers för mi dor. As lüttket Wicht bün ick bolde jeden Dag bi ehr wän. Jao, Oma harr immer wat tau Schlickern, wat tau'n Spälen in ehre Taschken. Bi Oma dröwde ick mehr as in'n Huuse. Läöter in't Studium häbb ick faoken naug van ehr 'n bittken Taschkengeld krägen. Dat stickde sei mi bi't Wegfeuhern meist stillken in miene Bücksentaschken off in miene Handtaschken. Nu, wo ick all lange in mien Läben sü'wes gaut taurechte kaom, häff sei jümmers Kaffee, Kauken un Tied för mi, wenn ick bi ehr inkieken dau. Un ick, wenn ick tüschken Arbeit un Freitied tüschkendör 'n bäten Tied häbbe, feuher ick dor gern maol hen.

Oma interessiert sick heller för aals, wat mit us is. Wenn ick dor bün, fraoget sei meistied uck väle nao. Weckentied roop ick ehr uck woll maol an un vertell ehr wat. Man dat kummp faoken väls tauminne vör, un dann is so'ne Wäken uck drocke wer ümme. Jao, Oma frait sick heller, wenn einer van us up Visite kummp. Un maol ehrlich, denk ick so bi mi, in ehr Läben passeiert jao uck minner as bi mi. Jao, un as ick dor nu so tauhuuse seet, dei Arger äöwer Oma mi nu uck sü'wes argerde, häbb ick den Telefonhörer naohmen un bi ehr anröpt.

Oma häff sick frait, ick uck! Wi häbbt lange schnacket un wörn us an'n Ende uck wer gaut. Oma kann meist sowieso nich lange grell wän. As ick nu den Hörer wer upleggt häbb, häbb ick so bi mi dacht, wekker weit, wolange ick miene Oma noch häbbe. Ick will nich dull mit ehr wän, will mi einfach blots fraien, dat sei mit bolde 90 Johr noch jümmers för mi dor is. Un dat is uck so'n Ümsüßgeschenk, wo ick dankbor för wän will.