Dat kannst mi glööven!
Dor hebb ik mi wat bi dacht!

vun Pastor Alexander Rolfes


To'n Anhören hier klicken:


Lesen deit Alexander Rolfes.


Mangers hebb ick dat all belävet, dat mi einer wat schonken heff mit den Satz: "Dor hebb ick mi wat bi dacht." Nich immer fort was mi kloar, wat dor achter wän kunn. Üm dat tau begriepen, dorför bruukte ick dann woll moal einen Moment, un erst eine Tied löter wütt mi dei Sinn dor achter klaor.

Van Herrn Wohllieb hebb ik disse Wäken all wat mehr vertellt. Hei wull van Gott wäten, wat hei mit denn Rest van sien Läven anfangen schull. Man Gott schweeg — un dei Grund dorför kunnde ja man bloß wän, dat Gott över üm noadachte ... un dat duurde...

Uck dei token Doage wassen Daoge, wor Gott schwiegen dö. Hei dachde noa, un Herr Wohllieb wull üm dorbie nu uk nich stöörn. Aover hei achtede nu wat mehr up sück sülvers, hüllt sück dei Döörn oapen, schellde nich mit sück, so at hei dat woll moal manges woll dö, wenn hei "Du ulle Döskopp" off "Nu riet di eis tausaome" tau sück seggen dö. Wenn Gott dei Allmächtige üm för so wichtig hüllt, dat hei all drei Doage över üm noahdachte, dann wull hei Gott dat gliecke daun, un sück sülwest uck för wichtig nähmen.

Jao, dat kann manges wat duurn, bit mi dei heile Sinn van einen Geschenk kloar wett, dat kann uck wat dürrn, bit ick ein Teiken off eine Antwort kriegen dau — aover wenn ick weit, dat dor einer an mi denken deit, dann kaom ik uk gaud dör de Tied, wor Schwiegen is. Bruuk dann villeicht gor kien Teiken mehr! Un mehr noch, ick nähm mi sülwest ganz anners woahr, hebb Respekt för mi. Dat lätt mi upmarken un väle Saoken mit 'n anner Ooge seihn. Mit Bernd Wohllieb in dei Geschichte passeiert uck wat: Toerste was hei bloß ganz för sück. Seehg bloß sück. Man dat deit nich gaud. Man is sik dann meist naoh 'n Tied över, weit mit sück nicks mehr antaufangen. Un jüst dann krigg Herr Wohllieb de Wissheit schonken, dat uk uck in disse einsaomen Tieden dor einer is, dei wat mit üm vörheff, dei sück wat bi üm dacht heff —, einen Ploan heff.

Dat lätt einen upsrisken. Un ick glööv, dat to begriepen, dat käönt wi aale jüss in disse Tied in 't Joahr gaud bruuken.


Översicht över de Reeg
"Dat kannst mi glööven!" is eine plattdütschke Andachtriege in't Radio (NDR),
dei siet den 1. Advent 1953 staodig in't Programm staiht.
Tau Tied schriewet hierför rund 75 evangelschke un katholschke Theologen
staodig Andachten up unnerscheidlicket Nedderdütschet un
Oostfäölschket Platt. Sendet werd maondaogs bit freidaogs
üm 14.20 Uhr van NDR 1 Neddersassen.

Bi us up plattpartu.de finnt man nu utsöchte Bidräge van disse Radiosendung.


12.2.2017


na baven