Dat kannst mi glööven!
Glück, wat is dat?

vun Alxander Rolfes

To'n Anhören hier klicken:

Lesen deit Alexander Rolfes.

Glück, wat is dat? 'ne Millionen in 't Lotto of bi Günter Jauch winnen? Aals koopen können, wat ik hebben will? Faoken denk wi, dat Glück mit sückes wat to daun hebben mott. Wisse, Geld is wichtig, dat man torechte kummt. "Man Geld allennig maakt nich glückelk", sägg ein Spräkwoort. Dor is wat an. Woväle giv 't, de hebbt Geld naug, man sei gaoht mit 'n suur off düüster Gesicht dör 't Leven. Glück, dat kannste woll nich koopen. Dor hört wisse noch mehr to as Geld.

Glück: Dor is ton einen mit mennt, dat wat good loopen is, wat over villicht uk scheiv gahn kunnt har. Ton annern is dor mit mennt, dat einen wat umzüß tofallen is. Dat hochdüütsche Woort "glücklich" kennt dat Plattdüütsche so nich. Dor bruukt de Plattdüütschen dat Woort "bliede" för, wat soväle mennt as "selig, fröhlich un fröndlik". Dat kummp ut de ollsassischen Spraak van dat Woort "blithi". In de engelsken Spraak kennt man dorför dat Woort "blithe". Verwandt is dat Woort "blied, of bliede wäsen" uk mit dat Bedüüden van dat engelske Woort "to be blessed", "sägent wäsen". Wenn einer bliede is, hollt he dat uk nich för sik allennig. Einer, de bliede is, stickt faaken de annern mit siene Fraide an.
Wenn tweie sik funnen hebbt un sik gaud sünd, dann sünd de beiden bliede. Dat kriegt gau alle rund üm ehr to mit. Un faoken fiert se ehr Glück dann bi de Hochtied mit väl anner Lüüe.

Glück, dat kannst nich sülvest maoken. Kriggst eenfach schenket — ümzüß. Dat is uk nich aaltied dat Groote un Gewaltige. Manges kummt dat heil sinnig d'rher. In ein old Gedicht hett dat:

Glück

Glück kann wäsen as dat Aobendlüüden,
wat to Ruh us stüürt naoh stievet, sturet Knojen.
Glück, dat kummt nich glieks dör bissen, jaogen,
dat winnst't uk nich dör noch soväle Fraogen,
nich in de Steerns of anns wietlöftig weg.
Dat Glück — du dreggst et all in di, deip binnen.
Du mosst dat bloß noch lehrn to finnen.

Bi us up plattpartu.de finnt man nu utsöchte Bidräge van disse Radiosendung.