Dat kannst mi glööven!
Neie Wäge gaohn

vun Alxander Rolfes


To'n Anhören hier klicken:


Lesen deit Alexander Rolfes.


"Hebb 'n Ooge up de, de nicks to bräken un to bieten hebbt, laot se nich hangen, wenn se in de Bredullje kaomen sünd. Sett dien Geld in för Frönde un Verwandte, laot et nich unnern Stein up Duur rustrig weern, bit et nicks mehr wert is. Legge di einen Schatz to, so as dat schräwen steiht in den sien Woort, de Himmel un Eern maoket heff. Van so 'n Schatz hest du up Duur mehr van as van aale dat Geld."


"Wenn ik de Nutt verbuddel un nich wedderfinn, wasst dor tominnst en Boom rut. Ut Geld nich!"

So käönt wi 't naohläsen bi Jesus Sirach, in 't olde Testament. Wisse wedd Se nu seggen: Dat kann man gaud seggen, wenn man Geld 'naug heff un sik üm Familge un Arbeit nich väle Sorgen maoken bruukt. Dann kann ik uk riekelk gäven. Man dor is nich mit mennt, dat wi sülvest nich uk gaud Leven dröfft. De Text stammt ut 'n Tied, wor man 't noch wennt was, dat man Geld ton Verwaohrn verstoppen dö, woll uk unnern Stein. Wenn man 't löter bruukde, höl man 't weer för 'n Dag. Un dann kunn 't kaomen, dat man de Stäe, wor dat Geld verstäken was, villicht vergäten har. Kunn uk wäsen, dat leipe Lüüe dat Geld klaut harn. Manges was dat Geld villicht uk heilmaols verrustert un nicks mehr weert. Dor kunn man dann nicks mehr mit anfangen.


"Wenn ik den Appel verbuddeln wöör,
wöör he fuul!"

Wisse. Vandaoge, jüst so as domaols, bruuket Mensken Geld ton Leven. Man jüst so as domaols uk all giff dat Mensken, för de gellt blots de schwatten Taohlen up de Bank. Dat is ehr Schatz. Un ehr einzig Bedrieven is 't, dat disse Schatz immer noch grötter weern schall.

Use Wirtschaft levt dorvan, dat an de Börse Geld maoket wedd un de Aktionäre immer mehr in de Knippen hebbt. Man is dat würklik de Schatz, de us tofräe un glückelk leven lätt? "Du büst mien Schatz!", dat segg ik heil faoken to miene Frau. Un jüst so faoken krieg ik dat uk weer van ehr to hören. Dat lätt mi risk up leven. Dag för Dag weer van neien. Aohne dissen Schatz kunn ik nich tofräe leven. Un wenn ik eis maol in de Bredulje kaom, dann sünd dor wecke, de mi nich hangen laotet. Un dat is ein heil besünnern Schatz. Van so 'n Schatz kann man gor nich naug ansporn. De verrustert nich. De wedd uk nich minner, wenn man dorvan riekelk geven deit.



"Dat kannst mi glööven!" is eine plattdütschke Andachtriege in't Radio (NDR),
dei siet den 1. Advent 1953 staodig in't Programm staiht.
Tau Tied schriewet hierför rund 75 evangelschke un katholschke Theologen
staodig Andachten up unnerscheidlicket Nedderdütschet un
Oostfäölschket Platt. Sendet werd maondaogs bit freidaogs
üm 14.20 Uhr van NDR 1 Neddersassen.

Bi us up plattpartu.de finnt man nu utsöchte Bidräge van disse Radiosendung.


19.11.2017


na baven