Laat mal wat van di hörn

van Sabine Brauer

Kannst du di up de Werbung van't Bundspost besinnen? "Schrief mol weer", hedde dat dor.

Wenn ik so överlegg, mutt ik de Werbung recht geven. Dat is moi, dat dat de Quasselstripp gifft, wenn ik gau wat up de Haart hebb.

Doch kummt dat vör, ik bün midden in een Telefonat, denn wor 'k dör irgendwat offlenkt. Mien Gegenover an't anner Strippelsiet hett kien Tied un hört gor nich recht to. Faken legg ik d' Hörer up un fraag mi: "Woröver hebbt wi nu egentlich proot?"

As Brevenschriever hebb ik dat all beter. Wenn ik dor 'n leven Minske een Freid moken will, kann 'k mi richtig utlaten. To 'n Bispöhl 'n mojen Bild up d't Breevpapier malen oder up de Computer een heel besünner Kunstwark maken.

In 'n stillen Stüün sett ik mi hen un bericht, wat 'k so up d' Haart hebb. Dorbi kann ik mien Gedanken utleven un kien een quasselt mi dor tüschen. De Geduld van d'anner word nich up de Proov stellt. Denn de kann later, wenn nöödig, de Breev bisiet leggen un hum to d'rechte Tied weer vörkramen. De Proot word nich unnerbroken.

Krigg ik van een leven Minske een Breev, hebb ik dor ok na vöhl Johren noch Freid an. Villicht is dat ja'n Överleggen wert, wenn man fix maal weer na de Telefonhörer griepen will.

Ok uns Vader in Himmel hull vöhl van d't Brevenschrieven. In d' Bibel hett he allens fasthollen, wat he uns to seggen hett. Dor vertellt he di, wo leev he di hett. Du kannst nalesen, wo Good s'Söhn vör dien Vergahn lieden muss, dormit du nich in d'Höll schmoren musst. He stürv för di an 't Krüüz, dormit du nich van Good trennt worst. Wenn du mit verbunnen wesen muchst, dürst du hum ok anröpen. Hä hett ok een Telefonnummer: 5015. In sien Breev an uns, dor steiht in Psalm 50,15:

Rööp mi an, wenn du in Nood büst, ik will di dor ruuthelpen un du sallst mi priesen.

Dorto bruggst du kien Telefon un ok kien Handy. Falt enfach dien Hannen to d't Gebeed, denn büst recht verbunnen. Hier worden kien Einheiten tellt, dat kost di kien Cent. Dat Best un Wichtigste is, Good lett sük nich offlenken un he verschufft de Anrööp nich up later.

Also, trau di! Rööp hum doch mal an.