Michael

vun Karl-H. Sadewasser

Dei Bildhauger Wilhelm Groß woor an'n 12. Januar vör 132 Johr boren un is an'n 9. Februar vör 41 Johren in Oranienburg storben. Hei keem ut Hinnerpommern un hett vele Figuren, de in in dei Bibel vörkaamt, ut Holt mit sien Haumetz mookt. Dorbi kreeg hei in'n Krieg tau hüren, dat in Rußland düütsche Soldaten Juden ümbröchen. Dor möök hei sich dorbi un faricht ut n' olle Wichel dei Figur von den Erzengel Michael an. Dei wöör süß in dei Kunst ümmer affbildt as Sieger un Gewinner in Gott sien Kraft.

Foto Falk S.

Anners nu bi Wilhelm Groß: Sien Michael is vör all dat Unrecht tausomensackt un möök Oogen un Uhren tau. Hei mag nix mihr hüren un weiten, woans Minschen in'n Krieg morden un starben. "Herrgott, stoh doch up in dien Kraft! Denn willn wi singen un dien Macht loben" — so hemm' Minschen al in dei Bibel no Gott un sien Macht för dat Leben raupen.

Wilhelm Groß

So as früher beläben wi hüüt uk, dat Gott nich ümmer allmächtig in dei Geschicht dor mank geiht. Uk dei Bildhauger hett woll so dacht, as hei von dat Starben in'n 1.Weltkrieg hüürt hett. Hei künn kum noch wat in sien Atelier farig kriegen. Öber in dei Bibel hett hei leest. Dorbi fünn hei dei Geschichten von Jesus: as dei in' Gorden Gethsemane üm sien Leben bäberte un an't Krüz elennig dood bleev. Gott lött uns nich ümmer an dat Unglück vorbi gohn, öber hei helpt uns dor dörch — so as bi Jesus.

Nich buten is Gott sien Macht oftmols tau finnen, nee, binnen in uns Hart wiest sei sik: Wi köönt fasthollen an Tauversicht un Maut. Wi köönt dei Minschen an dei Siet stohn, dei bäbern un bang sünd. So loben wi Gott sien Kraft in uns Tiet. Uk Wilhelm Groß möök dat so, wenn hei an sien Klavier seet un Dankleder speelt hett.