Dat kannst mi glööven!
De Welt vertellt van den Schöpfer

vun Heinrich Siefer


To'n Anhören hier klicken:


Lesen deit Heinrich Siefer.


De Wiske is ein Maolerfest, ein Farvendanz in gäl un rot un blaw. Överall blaiht de Blaumens, wiest sik frisket Greun an Busk un Boom. In jede Waoterstäe, dor schnabbelt wat. Dat Vogelvolk is quicklebennig un munter, trelleert un hüpket, verwaohrt de Nester. Hochbaoven schrillt Himmelszägen. Maitied.

Soore Lestjaohrslast breck off, neiet Leven kummp vörn Dag. De Sünne schinnt wat se kann. Ehr Straohlen fallt liek hendaol up Botterblaumen, Klöver, Kiekdörntuun un Fleerbusk.

Botterväögels flittket van eine naoh de annern Blaumen, Immen stuvet fliedig hen un her. Wind straokt mi sacht över 't Gesicht un bring einen krüdigen Räöke mit. In 'n Maimaand krigg aals ein anner Klöör.

De Maitied lätt mi de Welt rund üm mi tau mit heil anner Oogen bekieken. Ik bün dann gern in mienen Gorn un frai mi an aals, wat dor glömmt un blaihet, wat dor nu nao un nao sacht den Kopp ut de Eern sticket, de Sünne hentau. Ik glöv, dejenige, de den Psalm 104 schreven heff, de heff dat in de Maitied daon. Villicht was dat sogar ein Görner. Lustert eis maol tau:

Herr, ik kann gor nich anners, as di Lieder tau singen.
Wenn ik mi de Welt rund üm mi tau ankieke,
dann wedd ik künnig, wo wies un klauk un mit Verstand du doch aals maoket hest!
Lecht is dat Kleed, wat du dräggst.
Den Häwen spannst du över de Eern ut, as ein Telt.
Aals häst du up fasten Grund settet.
Du schickst dat Quellwaoter de Barge hendaol.
So find et sienen Weg.
Un aale, de Döst hebbt, käönt dorvan drinken.
An 't Euwer van de Bäke hebbt de Väögels ehre Nesters —
in Busk un Boom singt sei ehr Lied.
Du lättst Gräss wassen för 't Veih,
un Körn, wat de Mensken sik anbawet för Brot,
un Wien, dat se dorbi vergneugt sünd.
Herr, wo moie is aals, wat du maoket häs. Dor frai ik mi aale Daoge över.
Jo, besünners in de Maitied fallt mi weer so richtig up, wo moie aals rund üm mi tau is. Un dor möchd' ik eenfach maol Dank för seggen!


All Fotos: Antje Heßler

"Dat kannst mi glööven!" is eine plattdütschke Andachtriege in't Radio (NDR),
dei siet den 1. Advent 1953 staodig in't Programm staiht.
Tau Tied schriewet hierför rund 75 evangelschke un katholschke Theologen
staodig Andachten up unnerscheidlicket Nedderdütschet un
Oostfäölschket Platt. Sendet werd maondaogs bit freidaogs
üm 14.20 Uhr van NDR 1 Neddersassen.

Bi us up plattpartu.de finnt man nu utsöchte Bidräge van disse Radiosendung.


16.7.2017


na baven