Dat kannst mi glööven!
Gott steiht uk tau 'n Schleif*!

vun Heinrich Siefer

To'n Anhören hier klicken:

Lesen deit Heinrich Siefer.

Jakob heet he — he is so'n rechten Schleif. Man mag toeierste gor nich glöven, dat he in de Bibel so 'ne groote Rulle spält. Van Anfang off geiht all sien Daun un Denken bloß dorup ut, dat he dat Seggen nao 'n Dood van sienen Vaoder Isaak krigg. All as he geborn wedd, as Twilling, versöch he as eierster siene Fäutkes in 't Lecht van de Welt tau stäken. Man Esau is üm vörut. As de dann, Johre löter, schmachtig van 'ne Jagd nao Huuse kummp, luuert Jakob üm för 'n Teller Gemeus dat Erstgeburtsrecht of. Un as de blinne Isaak över 't Starwen ligg, överdüüvelt Jakob üm tausaome mit siene Mauder Rebekka. Se daut so, as wenn Esau un nich Jakaob bi Isaak an 't Bedde sitt. Üm dat Esau Hoore up 't ganze Liew heff, treckt sik Jakob dat Fell van 'nen Zägenbuck över. So krigg Jakob den Sägen, de van rechts wägen Esau tausteiht.

Jakob luchst Esau den Sägen af. Bild: Julius Schnorr

Man bruukt nich lange överleggen, wo 't wiedergeiht. Klor, Esau is dat ampaat nich van pass. Mott he doch nu sienen Brauer tau Deensten wäsen! Vör Iewer will he Jakob an 'ne Bost. Man de is all lange utneihet. Aohnde wull, wat üm blaihde. He will nao Haran. Dor waohnt noch wecke van ehre Sippskup.

Wat he dann ünnerwägens beläwet, hollt man nich för mögelk. Jakob is dootmeue un söch sik 'ne Stäe taun schlaopen, buten up freie Pläte. Dor dröömt he einen wunnersmoien Droom: 'ne Leddern reckt sik piel hoch van 'ne Eern bit in 'n Häwen. Engels stiegt dor up un daol. Baowen in 'n Häwen süht Jakob Gott. De prootet üm gaud to: "Ik bün de Herr, de Gott van dienen Vaoder Abraham un de Gott van dienen Vaoder Isaak. Ik staoh di bi. Worhen du uk geihst!"

Jakobs Droom. Fresko ut't Katharinenkloster, Foto Florien Prischl/Wikimedia Commons

Annern Morgen begripp Jakob erst, wat dat mit den Droom up sik har un mennt: "Is nich tau glöven. Gott is hier bi mi, uk an disse Stäe. Dat har ik nich dacht!"

Twei Saoken sünd dat, de mi bi disse Geschichte aaltied weer in 'n Sinn kaomt:
Gott kummp us Menschken aaltied van neien weer intaumeute. Uk dann, wenn wi nich jüst besünners fraom usen Padd dör 't Läwen gaoht. He lätt nich van us off.

Dat annere is: Wi mäöt over uk up üm lustern willen. Üm uk dor tolaoten, wor wi üm eis nich verwachten daut. Gott röget sik woll. Wi käönt üm gewohr weern. Man wi mäöt dat man uk willen.

*Verkloren: Schleif = Undäög

Bi us up plattpartu.de finnt man nu utsöchte Bidräge van disse Radiosendung.