Dat kannst mi glööven!
Gott Vaoder — Gott Mudder?

vun Heinrich Siefer

To'n Anhören hier klicken:

Lesen deit Heinrich Siefer.

"Herr, bring us bi, wo wi bäen käönt?", fraogt de Jünger Jesus. Un he segg: "So schöllt ji bäen: "Use Vaoder in 'n Himmel!"

Nu giv dat ampatt nich minne Lüüe, de sik dor an stöten doot, dat wi to Gott Vaoder seggen schöllt. Nich bloß Froolüüe. Veele hebbt so ehre Last mit 'n Vaoder, de nich good wäsen is, de bange maokt heff, Lieden brocht heff. So meent wecke, wi kunnen doch uk woll bäen: Gott, use Mudder in 'n Himmel.

Mudder. Bild vun Paula Becker

Mudder Gott. De Bibel heff dor schients kien Problem mit. De Prophet Jesaja schriff: "Hört, wat Gott segg: Mien Volk mennt: Gott heff mi verlaoten. He heff mi vergäten. — Man wo kann dann een Froomensk ehr Kind vergäten, een Mudder ehren eegen Säöhn? Un wenn dat uk eis würkelck pesseiern schull: Ik vergät di nich!" — Un een poor Kapitel wieder läse wi: "So as 'n Mudder ehren Säöhn good toprooten deit, so tröste ik jau."

Gott sülvest verglick sien Hanneln mit dat Doon van een goode Mudder. Uk Jesus bruuket dat Bild van een Mudder, wenn he to de Lüüe segg: "So faoken wull ik jau nu all bi mi sammeln, so as dat een Klucke deit, de ehre Küüken unner ehre Fläögels nehmen will."

Gottvaoder bi de Arbeit. Bild vun Michelangelo

Gott is as een goode Mudder: tröstet us, giv us Schuul, wisket us de Traonen of. Gott is uk use Vaoder. Steiht stark an use Siete. Un off wi nu Vaoder off Mudder segget — beide Wöör kaomt ut use Alldagsspraok un prootet van Gott up use Aort un Wies. Doch Gott is aaltied uk heil anners, is nich to beschrieven, nich in een Woort to faoten. Gott is aaltied veel grötter. Aale Naomens, de wi üm gevet, bünd glieker Tied richtig un uk verkehrt.

Man wo schall ik nu to üm bäen? Wenn ik, so as ik dat wennt bün, "Use Vaoder in'n Himmel" bäe, dann denk ik dorbi uk mit: Use Vaoder in 'n Himmel, de du mi leev hest as een goode Mudder.

Bi us up plattpartu.de finnt man nu utsöchte Bidräge van disse Radiosendung.