Dat kannst mi glööven!
"Du sühst mi!"

vun Heinrich Siefer

To'n Anhören hier klicken:

Lesen deit Heinrich Siefer.

"Du sühst mi!" — so luutde dat Leitwoort van'n lessden Karkendag in Berlin. Dat heff mi toseggt. Bi dat Motto is mi glieks de groote Mystiker un Theologe Nikolaus van Kues infallen. He levde in 't 15. Johrhunnert un was domaols as Biskup van Bozen-Brixen un as Theologe överall bekannt.

Een Frönd van üm was doonts Abt van 'n Kloster an 'n Tegernsee. De wull van üm gern wäten, wo he siene Breuers in 't Kloster künnig maaken kunnde, wo man Gott verstahn un begrieplich maoken kunnde. Biskup Nikolaus heff üm domaols eine Christus-Ikone un d'rto een Breef schicket. In 'n Breef stünd to läsen:

Leve Breuers, ik möchd' jau bidden, de Ikone an een Wand in de Kapelle uptohangen. Dann stellt jau aale in 'n Kring dorför hen un kiekt up dat Beld van Christus. Jeder enkelde van jau wedd nu glöven, egaol wor he uk staohn deit, dat Christus bloß üm allennig ankieken deit. Un ih wedd jau doröver wunnern un fragen, wo dat bloß wäsen kann? Man ik möchd' jau bidden, noch een anner Übung to maoken: Dann mag sik jede Brauer noch maol enkeld vör dat Beld henstellen un dann sacht vör dat Beld up un daol gaohn, eenmaol van 'n Osten her, dann von Westen her. Un jeder, de dat dann doon heff, wedd marken: Christus kick mi an, gliekeveel wor uk ik staoh. Un Christus geiht mi uk mit siene Oogen naoh. He kick mi an, so as wenn he bloß üm mi sik sörget. So leev heff he mi. So wichtig bün ik üm. Worhen ik uk gaoh un wor ik uk staoh, van aalen Sieten is he ümme mi to. He süht mi.

Jo, wi wätet aale, wo wichtig dat is, dat us einer ankieken deit. Einen ankieken, dat mennt: Ik mag di lieden. Du büst wichtig!

Christus-Ikone vun'n Sinai

Mit de Ikonen is dat so, dat de aale naoh een besünner Technik maolt wedd, besünners de Christus-Ikonen. Bi de Oogen is dat aaltied so, dat se den, de dat Bild ankieken deit, uk ankieket. Man nich bloß dat: se kieket den, de dat Bild ankieken deit, van aale Stäen gliek ut an. Off man nu liek vör dat Bild staohn deit, of lünker Siet, of nu rechter Siet van dat Beld. Un wenn man vör dat Bild up un daol gahn deit, heff man dat Geföhl, de Oogen gaoht mit. De Ikone vertellt: Gott süht mi. Wor ik uk staoh, worhen ik uk gaoh! He interesseert sik för mi. Un dat bliv! Uk dann, wenn ik üm eis maol den Rügge todraihen doo.

Bi us up plattpartu.de finnt man nu utsöchte Bidräge van disse Radiosendung.